VEILIG SLAAP IN DIE WINTER
Wiegiedood is ’n baie groter werklikheid in die winter as in die somer, veral in die nag en in die eerste paar lewensmaande. Dit word dikwels toegeskryf aan ouers se geneigdheid om hul babas te warm toe te maak sodat hulle oorverhit. Hier is ’n paar basiese veiligheidsreëls: • Plaas jou baba in die korrekte posisie in die kot: Sy voete moet onder reg teenaan die onderkant van die kot wees sodat hy nie dieper onder die komberse in kan wriemel nie. • Maak seker geen komberse kan oor jou baba se kop of gesig skuif nie deur dit langs die matras in te steek. • As jy jou baba in ’n kokon toedraai, maak seker dit is nie te los (sodat die kombersies kan loskom en oor sy gesig skuif) of te styf (sodat hy oorverhit) nie. Moenie duvets of poolvlieskombersies gebruik nie, aangesien dit tot oorverhitting kan lei. • Moenie elektriese komberse of warmwatersakke gebruik terwyl jou baba in die kot is nie. Jou baba kan nie wegskuif of dit afsit as dit te warm word nie. • Moenie jou baba met ’n mussie of kappie op laat slaap nie. As hy te warm kry sukkel hy meer om sy temperatuur te reguleer.