BABAKOS is maklik
Mamma se kos bly maar die beste! Ons wys jou hoe eenvoudig en vinnig jy self jou baba se kos tuis kan berei.
Babas behoort van ses maande af ’n verskeidenheid kosse uit al die voedselgroepe te begin eet – eers purees en dan stelselmatig growwer kos en ook vingerkos. Tuisgemaakte kos het baie voordele bo kommersiële babakos: Daar is ’n groter verskeidenheid, jy kan die kosse apart aanbied, jy kan die tekstuur stelselmatig growwer maak, dit proe soos huiskos en dis natuurlik baie goedkoper. Jy kan dit boonop maklik en vinnig maak deur sommer saans terwyl jy in elk geval moet kook, ’n paar happies vir jou baba te prakseer en te vries. Dit is dus ook moontlik vir mammas wat heeltyds werk.
TOERUSTING
Jy hoef nie ’n fynproewersjef te wees met ’n kombuis vol luukse masjiene nie. Jy kan met net ’n pot en ’n mes en vurk babakos maak. ’n Aartappelfynmaker en handmodel-voedselverwerker is nuttig, veral om groente of vars vrugte fyn te druk of kap.
As jy kan, belê ook in ’n stokmenger. Dit sal veral help om vleis fyn genoeg te kry dat jou baba dit met gemak van ses maande af kan eet.
As jy plek in jou kas het vir nog ’n item, sal ’n stomer ’n slim keuse wees. Daarmee kan jy ’n paar verskillende kosse op een slag gaarmaak. Voedingstowwe bly ook goed behoue en jy hoef nie bekommerd te wees dat dit aanbrand nie.
VLEIS EN VLEISALTERNATIEWE VIR BABA
GESKIKTE SOORTE Vars hoenderdytjies en -boudjies, hoenderlewer, lewer, beesskenkel, maalvleis, varkvleis, wildskenkel, vars vis soos salm, forel, haring of makriel, skoon, bevrore vis, eiers (goed gaargemaak), tuisgekookte bone en lensies BLY WEG VAN Weense worsies, alle kommersiële koue vleise, alle gerookte vleis, hoender of vis, visvingers, blikkies vis, bevrore vis met krummels of souse, soesji, gemarineerde hoender, bevrore hoender met soutwater, geblikte soutvleis, wors, biltong en droëwors, gegeurde sojamaalvleis, gekrummelde hoenderrepies, geblikte bone in tamatiesous, geblikte bone of lensies, rou en saggekookte eiers
STAP VIR STAP GAAR: HOENDER EN VLEIS
1 Plaas hoender in ’n pot of taai snitte soos skenkel in ’n drukkoker. 2 Voeg sowat ½ koppie water vir elke 500 g vleis by. 3 Bring tot kookpunt, verlaag die hitte en laat sowat ’n uur prut. Voeg nog water by indien nodig. 4 Verwyder van hitte en haal alle bene uit. 5 Plaas die vleis of hoender in ’n hoë beker saam met ’n bietjie van die water waarin dit gekook is. 6 Maak fyn met ’n stokmenger terwyl jy nog van die kookwater byvoeg indien nodig of sny fyner met ’n mes en vurk. 7 Volg die stappe vir bevriesing op die volgende bald.
STAP VIR STAP GAAR: VIS
1 Plaas die vis in ’n pan saam saam met ’n bietjie water. 2 Sit die deksel op en verhit tot kookpunt. Verlaag die hitte en laat prut vir 10 minute. 3 Verwyder alle grate en puree met ’n stokmenger of sny fyner met ’n mes en vurk. 4 Volg die stappe vir bevriesing.
HEILSAME GROENTE
GESKIKTE SOORTE Enige vars groente, bevrore groente sonder souse
BLY WEG VAN Geblikte groente, bevrore roomspinasie
STAP VIR STAP GAAR: SPINASIE EN ANDER BLAARGROENTE
1 Was die blare goed onder lopende water af. 2 Sny die stingels af en kap die blare fyn. 3 Plaas in ’n pot saam met net die water wat op die blare is. 4 Bedek met ’n deksel en verhit tot dit stoom. 5 Stoom sowat 5 minute teen ’n hoë temperatuur. 6 Verwyder van die hitte, plaas in ’n diep beker en puree met ’n stokmenger of sny fyner met ’n mes en vurk. 7 Volg die stappe vir bevriesing.
STAP VIR STAP GAAR: PAMPOEN, WORTELS, BROCCOLI EN ANDER GROENTE
1 Skil die groente met ’n dik harde skil af en sny in groot blokke. 2 Groente met ’n dun, sagte skilletjie kan net goed onder lopende water skoon geborsel word met ’n groenteborsel of ’n skoon, harde naelborseltjie. Sny kleiner net indien nodig. 3 Plaas die skoon groente in ’n pot met water wat 1 tot 2 cm diep is, of in ’n stomer. 4 Stoom 10 tot 20 minute of kook 15 tot 20 minute teen ’n hoë temperatuur. Vul die water aan indien nodig. 5 Verwyder van die hitte, plaas in ’n diep beker en puree met ’n stokmenger of druk fyn met ’n aartappelfynmaker of vurk. 6 Moenie nog water byvoeg wanneer jy dit puree nie. 7 Hou genoeg groente vir twee dae in ’n lugdigte bakkie in die yskas en vries die res.
GESONDE STYSEL
GESKIKTE SOORTE Bruinrys, patats, jongaartappels, Bulgaarse koring, pêrelgort, heelkoringpasta, mieliepap, hawermout, pitmielies, saadbrood, lae-GI-heelgraanbrood, suiker- en soutvrye Weet-Bix, suikervrye ysterverrykte babapap BLY WEG VAN Witbrood, tweeminuutnoedels, kits-kapokaartappels, geblikte geroomde suikermielies, gegeurde kommersiële babapap, kitsontbytgraan, kitshawermout, kitsmieliepap, beskuit, koekies, baba-tandebeskuitjies met bygevoegde suiker
STAP VIR STAP GAAR: PATATS EN AARTAPPELS
1 Borsel die patats en aartappels goed onder lopende water skoon. Sny lelike plekkies weg. 2 Plaas in ’n pot waarin die water sowat 5 cm diep is, of in ’n stomer. 3 Stoom of kook 20 tot 30 minute teen ’n matige temperatuur. 4 Verwyder van die hitte, plaas in ’n diep beker en puree met ’n stokmenger. Indien jy nie ’n stokmenger het nie, trek die skilletjies af en druk fyn met ’n aartappeldrukker of ’n vurk. 5 Bêre genoeg vir twee dae in ’n lugdigte bakkie in die yskas en vries die res.
STAP VIR STAP GAAR: RYS EN ANDER GRANE
1 Meng rys of gort met ’n gelyke hoeveelheid gesplete rooilensies. 2 Voeg drie keer die hoeveelheid kookwater by en laat prut 40 minute oor ’n lae hitte. 3 Die rooilensies hou die ryskorrels bymekaar sodat dit veilig is vir ’n baba van sewe of agt maand oud.