HOE OM FIEMIES NIE TE HANTEER NIE
Die normale eienskappe van peuters wat fiemies tot gevolg het, kan in groter probleme ontaard as dit nie gepas hanteer word nie. Moet dus nie die volgende doen nie:
• Moenie daaroor praat nie. As jy voor jou kind oor haar kosafkeure praat, versterk jy dit.
• Moenie net die kosse aanbied wat jy weet jou kind eet nie.
• Moenie vir die kinders ander kos maak as wat die grootmense eet nie.
• Moenie vir jou kind iets anders gee as sy die kos weier wat jy voorgesit het nie.
• Moet nooit vir jou kind vra: ”Wat wil jy eet?” nie.
• Moenie ’n bohaai opskop nie. Dit kan juis die gedrag aanmoedig omdat sy so aandag kry.
• Moenie jou kind se aandag aftrek met TV of speelgoed sodat jy ’n paar ekstra happe kan inkry nie.
• Moet nooit jou kind dwing om iets te eet nie.
• Moenie jou kind prys as sy haar kos opeet nie. Lof kan net gebruik word vir haar waagmoed om iets te beproef waarvan sy nie hou nie.
• Moenie jou kind beloon as sy sekere kosse eet nie.
• Moenie jou kind omkoop met nagereg as sy haar groente eet nie.
• Moenie jou kind dwing of aanmoedig om nog te eet nadat sy die eerste versadigingstekens gewys het nie.