HIERMEE KAN JY DADELIK BEGIN
Die Johannesburgse vroedvrou Tina Otte sê jy kan hierdie oefeninge binne 24 uur ná die operasie begin doen.
DWARS-MAAGOEFENING
GEE OEFENING AAN die diep spiere voor en langs die maag, die bekkenvloer en die onderrug Lê op jou rug. Sorg dat jy in ’n neutrale ruggraatposisie is waar jou rug nie gebuig of heeltemal plat is nie, maar iewers tussenin.
Asem gemaklik in en saggies uit. Trek die onderdeel van jou maag terselfdertyd in die rigting van jou ruggraat. Hou vyf sekondes en ontspan die maag geleidelik. Dit is ’n baie ligte oefening.
Wanneer jy jou maag diep intrek, word die interne skuinsspiere sterker. Voer hierdie beweging twee keer per dag twee tot 10 keer uit voor jy uit die bed klim.
BEKKENKANTELOEFENING MET KUSSING
GEE OEFENING AAN die onderrug en - maag Lê op jou rug met die knieë gebuig en voete skouerwydte uitmekaar. Plaas ’n dun kussing onder jou bekken. Asem in. Asem dan uit en rol terselfdertyd jou heupe sagkens terug en maak jou ruggraat plat. Begin weer by die beginposisie. Rol jou heupe effens vorentoe en maak jou ruggraat rond. Doen dit twee keer per dag drie tot 10 keer.
NEKROTASIE
GEE OFENING AAN jou nek en maag Lê op jou rug met jou knieë gebuig, skouerwydte uitmekaar. Trek jou naeltjie stadig na jou ruggraat toe. Asem uit en lig terselfdertyd jou kop van die vloer af tot jou ken amper op jou bors is. Hou dit drie sekondes; sak terug. Doen dit twee keer per dag twee tot 10 keer.