LOOPRING, OF NIE?

ANRO-MARI COHEN ANTWOORD:

Mense se lewe is deesdae so bedrywig, veral ma’s s’n. ’n Loopring is ’n baie aanloklike opsie wat jou kind sal besig hou sodat jy net by al jou daaglikse dingetjies kan uitkom.

Party mense glo dat ’n loopring jou kind help om vinniger te begin loop; dis nie waar nie. Oormatige gebruik van ’n loopring kan juis dié mylpaal vertraag. ’n Baba wat te veel tyd in ’n loopring deurbring se beweeglikheid word belemmer.

Babas se spier- en mylpaalontwikkeling moet in ’n spesifieke volgorde plaasvind. So ook hul verstandelike ontwikkeling, koördinasie en balans. As jy jou baba te vroeg aan ’n loopring bekendstel, maak jy hom mobiel nog voor hy op ander vlakke daarvoor gereed is. Die gevolg is dat sy spiere nie ontwikkel soos dit moet nie.

’n Loopring kan jou kind dwing om meer gewig op sy beentjies te dra as wat by sy ouderdom pas. Die looppatroon wat hy so aanleer, is abnormaal en kan veroorsaak dat hy later op sy tone loop. Die haksening word boonop verkort, wat ook ander probleme veroorsaak.

Dis belangrik vir jou kind se ontwikkeling dat hy staan, val en weer opstaan. ’n Loopring ontneem hom van dié vaardighede. Dit keer hom boonop om sy omgewing met sy hande te leer ken en belemmer sy ruimtelike persepsie.

Jou kind leer ook nie hoe om sy balans te handhaaf nie. Omdat jy hom in ’n regop posisie plaas voor sy lyf gereed is om regop te wees, ontwikkel sy kernspiere nie na wense nie. Dis omdat baie babas net in ’n loopring hang pleks van hul spiere te gebruik om hul posisie te handhaaf. Die gevolg: swak spiertonus en postuur.

Alles wat ek hierbo noem, kom neer op ’n baie groot nee vir loopringe.

Dit bly egter ’n persoonlike keuse. As jy wel een wil aanskaf, maak seker jou baba se mylpale is op datum en beperk die tyd in die loopring tot hoogstens 20 minute per dag.