KONSENTRASIEPROBLEME
My kind is in Graad O en die juffrou sê sy sukkel om te konsentreer. ’n Vriendin neem haar kind na ’n spelterapeut om met konsentrasieprobleme te help. Wat doen die spelterapeut en help dit?
MADELEIN KOEN ANTWOORD: Baie kinders sukkel met konsentrasie, veral wanneer hulle die eerste keer blootgestel word aan die formele skoolomgewing en akademiese takies wat vanaf Graad O deel van hul lewe word. Met spelterapie word ’n kind gehelp met die hulp van tegnieke en mediums soos speletjies, klei en tekeninge.
Anders as volwassenes, beskik kinders nie oor die woordeskat om oor hul probleme te gesels nie. Spelterapie maak dit vir hulle moontlik om in ’n veilige omgewing op ’n kreatiewe manier deur probleme te werk en vaardighede te leer. Kinders leer inderdaad deur te speel!
Kinders met konsentrasieprobleme kan dit moeilik vind om hul gedrag te beheer. ’n Spelterapeut kan daarmee help deur jou kind te leer om impulse te beheer. Sy ondersoek ook hulpmiddels wat jou kind se konsentrasie kan help verbeter. Tydens terapie implementeer sy doelwitte en belonings wat jou kind aanmoedig om emosionele selfregulering toe te pas.
Spelterapeute gebruik speletjies wat kinders se geheue en konsentrasie versterk. Dit sluit in die memorisering van patrone, die terugpak van prentjies in volgorde en die uitvoer van opdragte binne ’n gegewe tyd.
Blokkiesraaisels en legkaarte word ook ingespan.
Kinders geniet die aktiwiteite en ervaar dit as “speel” eerder as terapie. Deur herhaalde spel kry hul breinpaadjies oefening en word dit uitgedaag, wat breinverbindings versterk en funksionering verbeter.
Die spelterapeut kan ook bepaal of daar ’n ander onderliggende probleem skuil.
In sommige gevalle kan emosionele probleme soos angs, aanpassingsprobleme, aggressie, trauma, probleme by die huis en leerprobleme moontlik bydra tot ’n kind se onvermoë om te konsentreer.
As sy nie verbeter nie en haar akademiese vordering daaronder ly, sal die spelterapeut haar na ’n pediater of kinderpsigiater verwys vir verdere assessering en moontlike mediese ingryping.