Winterslim swangerskap
Die winterkoue bring unieke uitdagings vir jou swangerskap mee ...
Die winter is hier. Soggens is dit nog pikdonker, die lug het ’n byt, die dae is net te kort. ’n Winterswangerskap voel darem nie te vreesaanjaend nie, want jy het mos jou eie ingeboude verwarmer wat jou liggaamstemperatuur ’n paar grade opjaag. Dis nou tot almal hul verwarmers aanskakel en jy wil uitbraai terwyl die mense om jou bibber. Skielik begin jy op ’n hele paar vlakke kwesbaar voel ...
VIETS EN FIKS
Die kouer winterweer en korter dae kan dit ekstra moeilik maak om jou te motiveer om fiks te bly, maar die Kaapse fiksheidskenner Tania Nuys sê dis nou die tyd om jou te herinner aan al die voordele wat gereelde oefening inhou.
“Nie net help gereelde ligte oefening regdeur jou swangerskap om sekere swangerskapskwale weg te hou nie, dis ook uitstekende voorbereiding vir die geboorteproses. Dit hou jou spiere ferm en maak dit makliker om agterna te herstel.”
As die koue winterweer jou onderkry, kan jy gerus ’n oefenroetine oorweeg wat
jy sommer in jou slaapkamer tuis kan doen sodat jy nie die koue hoef te trotseer nie.
“Skaf ’n jogamatjie, oefenbal, rekband en ’n paar ligte gewigte aan en begin tuis oefen. Dan kan jy soggens sommer uit die bed rol en gou 15 tot 20 minute se ligte oefening inwerk. Dit hoef nie lang, intense en hoëkardio-sessies te wees nie; dis belangriker dat jy meer gereeld vir korter tye oefen,” sê Tania.
Doen spesifiek liggaamsgewig-oefeninge wat jou kernspiere versterk en stabiliseer. As jy ’n natuurlike geboorte beplan, is hurkoefeninge belangrik omdat dit jou bekkenvloer soepel help hou.
Tania se raad is dat jy hoofsaaklik vloeroefeninge doen, of oefening wat beweging tussen die oefenbal en vloer behels. “As jy gedurig opstaan en weer gaan sit, kan dit jou duiselig laat voel, veral as jou bloeddruk laag is.” Drink ook genoeg water terwyl jy oefen. Meer informele oefening soos om elke aand ’n entjie te gaan stap, sal ook uitstekend wees vir jou gemoed en lyf.
AS VERKOUE JOU BEETKRY
Dit snuffel en snuif gewoonlik in die wintermaande en dit voel soms byna onafwendbaar dat jy gaan aansteek. Tog bly voorkoming altyd beter as genesing en een van die maklikste en beste maniere om te keer dat jy verkoue of griep kry, is om gereeld jou hande te was, sê suster Karen van der Merwe, ’n vroedvrou van Johannesburg.
“Die meeste kieme word per hand oorgedra. As jy enigsins in aanraking kom met mense wat klaar siek is, wees besonder nougeset en was jou hande gereeld.”
As jy wel siek word, is dit belangrik om tred te hou met jou simptome en betyds by die dokter uit te kom as jy vermoed die siekte word ernstiger. Moenie sommer enige oor-die-toonbank-medisyne drink en dink dit is veilig nie. “Baie middels is verbode tydens swangerskap. Jou spesifieke swangerskap en mediese geskiedenis gaan ook bepaal watter medisyne jy kan drink,” waarsku Karen.
Sy beveel aan dat jy natuurlike opsies oorweeg soos vitamien C of kos met baie knoffel in, aangesien knoffel siekte op ’n natuurlike manier help bestry. Genoeg bedrus, ’n gebalanseerde dieet en voldoende water is ook nodig.
Moet dus nie werk toe gaan as jy regtig goor voel nie; gee jou liggaam liewer kans om te herstel. Jou immuunstelsel is immers meer kwesbaar as gewoonlik en het die ekstra hupstoot nodig.
Sou jy koors of ’n seer keel ontwikkel, kan jy parasetamol drink, maar as jou koors langer as 24 uur duur, moet jy liefs dokter toe gaan.
“Jy behoort ook dadelik dokter toe te gaan as jy iets uithoes of as die slym nie meer deursigtig is nie, maar groen lyk. Dit is gewoonlik ’n teken van ’n bakteriese infeksie en jou dokter sal dit moet behandel met inagneming van jou swangerskap en mediese geskiedenis,” sê Karen.
SIEN OM NA JOU LYF
Droë, skilferige en soms jeukende weefsel neem veral in die winter oor waar jou “normale vel” eers was, sê Izelle Louw van die Mommy Wellness-dagspa in Durbanville, Kaapstad.
“Dis heeltemal normaal om in jou swangerskap ’n bietjie soos ’n reptiel begin voel. Veral in die winter kan jou vel droër wees en kan jou magie jeuk.
“Dis onder meer omdat jou vel rek om die groeiende baba te akkommodeer. Maak dus seker dat jy genoeg water inneem en heeltyd gehidreer bly.”
Dis ook belangrik om ’n goeie en ryk bevogtiger te gebruik.
“Kies een met ’n oliebasis eerder as ’n waterbasis, aangesien die olie ’n beskermende lagie oor die vel vorm wat meer vog sal binne hou as ’n room of salf,” is Izelle se raad.
’n Vogsproeier in die kamer kan ook help om jou liggaam in die winter vogtig te hou, sê Izelle. “Skakel dit snags aan om die lug vogtiger te maak. Jy kan van die tweede trimester af ook essensiële bloekomolies by die water in die vogsproeier voeg – dit kan ’n toe neus help verlig as jy met verkoue of sinusontsteking sukkel.”
Ten laaste beveel Izelle aan dat jy ’n afskilfering ondergaan.
“Dis veilig om jou hele lyf te laat afskilfer, al is jy swanger. Dit sal jou help om van die droogheid en jeukerigheid ontslae te raak en in die plek daarvan ’n gloeiende voorkoms te kry.
“Afskilfering sal ook help met jou bloedvloei en indirek met waterterughouding en selluliet. Onthou net om nooit af te skilfer sonder om agterna te bevogtig nie. Jy moet ná ’n afskilfering altyd deeglik bevogtig om die vel te voed.”
VOETVERSORGING
Natuurlik is daar niks slegter as om jou eie voete te versorg nie, veral as jy ver swanger is en nie meer oral kan bykom nie. Gebarste hakke is ’n winterkwaal wat jy ook nie tydens swangerskap vryspring nie, veral nie in die droër dele van ons land nie. Iewers sal jy dus hakke moet skuur en met room moet smeer.
Izelle beveel gereelde pedikure aan. “Mani-en pedikure is heeltemal veilig terwyl jy swanger is, want chemiese middels word nie deur jou naelbed geabsorbeer nie. ’n Pedikuur saam met ’n been- en voetmassering is uitstekend vir jou bloedsomloop. Daarby sal die bietjie koestering jou sommer beter laat voel en jou gemoed lig.”
As jy nie ’n pedikuur kan laat doen nie, vra sommer vir manlief om elke aand jou hakke te skuur en jou voete te vryf (om die swelling te verminder, kan jy vir hom sê) en met room in te smeer.
Laat jou vel gerus afskilfer – dit sal die alewige gejeuk verlig. Bevogtig dan goed.