V& A borsvoeding
VEk is 30 weke swanger en het baie gelees oor borsvoeding. Ek wil graag my baba borsvoed. Ek hoor dikwels hoe goed dit vir my baba sal wees, maar hou dit vir my ook voordele in?
ALISANNE DU PLESSIS ANTWOORD:
Jy is heeltemal reg! In ’n reeks oorsigartikels wat onlangs in die hoog aangeskrewe mediese joernaal The Lancet verskyn het, is tot die slotsom gekom dat borsvoeding belangrike voordele inhou vir babas én hul ma’s, of hulle nou in ’n hoë-inkomsteland woon of nie. Die bewyse vir die kort- en langtermynvoordele van borsvoeding is nou sterker as ooit.
Borsvoeding beskerm ma’s teen borskanker. Met elke 12 maande wat ’n vrou in haar leeftyd borsvoed, verlaag die risiko dat sy ernstige borskanker sal kry met 4,3 persent.
Daar is ook bevind dat 19 464 sterftes wêreldwyd voorkom kan word as jy borsvoed. ’n Ekstra 22 216 lewens kan dus gespaar word as vroue vir langer tydperke borsvoed (12 maande tot twee jaar per kind).
Vroue se kans om eierstokkanker op te doen neem ook met 30 persent af as hulle langer aanhou borsvoed. Borsvoeding kan hulle boonop teen tipe 2- diabetes beskerm.
Borsvoeding maak dit daarby makliker om die gaping tussen jou kinders te beheer. Eksklusiewe borsvoeding in die eerste ses maande van ’n baba se lewe beskerm sy ma teen ’n volgende swangerskap. Dit word die laktasie-amenorreemetode (LAM) genoem. Dit is 98 persent veilig as baba net borsmelk en geen ander vloeistof of vaste kos ontvang nie, as jou menstruasie nog nie teruggekeer het nie, as baba jonger as ses maande is en as baba bedags minstens vieruurliks en snags minstens sesuurliks voed.
Volgehoue borsvoeding ná ses maande, wanneer baba met vaste kos begin het en jy aanhou borsvoed, kan ovulasie en menstruasie steeds onderdruk, maar dis nie meer so doeltreffend soos voor ses maande nie.
Volgehoue borsvoeding kan egter in kombinasie met van die ander gesinsbeplanningsmetodes ingespan word om ’n volgende swangerskap te voorkom.