DAG 1 DIE EERSTE 24 UUR
GEBOORTE MAAK SAAK Uit ’n borsvoedingsperspektief is ’n natuurlike geboorte die ideaal. Enige mediese ingryping, veral medikasie, kan borsvoeding kniehalter. Natuurlik is ingryping soms onvermydelik, maar dis belangrik om die potensiële newe-effekte te verstaan ten einde die borsvoedingsvriendelikste keuses te maak. Jy het drie opsies vir pynverligting: • Entonox, oftewel laggas: Dit tas borsvoeding nie aan nie,
want dit word uitgeasem voor dit jou ongebore baba bereik. • Petidien: Dit laat borsvoeding maklik in ’n nagmerrie ontaard. Dié morfienderivaat verswak pasgeborenes se suigrefleks, maak hulle traag en is eers ná sowat twee weke heeltemal uitgewerk. • Epidurale verdowing: Die invloed hiervan op borsvoeding is minder rampspoedig, maar duur nogtans tot ’n maand. Om mee te begin sal jou melk waarskynlik later inkom. Jou baba kan sukkel om die bors te vind, vas te suig of behoorlik te suig. Dis probleme wat op hul beurt seer tepels, min melk, borsstuwing en selfs mastitis (melkkoors) kan veroorsaak. INSTRUMENTVERLOSSINGS
Is jou pienkvoet met behulp van ’n tang of suigapparaat gebore? Wees ekstra geduldig, hy kan aanvanklik met borsvoeding sukkel. Sy koppie sal gekneus wees; ondersteun dus liefs sy nek wanneer jy voed.