SO HET ONS DIT BELEEF
ESTI JOUBERT (29) VAN PORT ELIZABETH
Met die geboorte van ons babadogtertjie, Leah Elizabeth (1 maand), het ek en my man, Paul, nie regtig geweet wat “normaal” is nie en ook nie wat om te verwag as dit by vuil doeke kom nie. Ons het net geweet dat ons gereed moes wees met ’n goeie voorraad doeke in die kas!
Asof haar geboorte nie genoeg opwinding vir die dag was nie, het haar magie sommer onmiddellik gewerk nadat die dokter haar vir my gegee het. Haar eerste vuil doek het ’n swart, taaierige voorkoms gehad. Dit was egter baie min en ’n mens kon dit nie eens ruik nie.
Die hospitaalpersoneel het verduidelik dat namate my borsmelk die volgende paar dae sou verander, die kleur en voorkoms van haar stoelgang ook sou verander.
Die kleur het inderdaad geleidelik ligter geword en is nou mosterdgeel. Ek het ook agtergekom dat wanneer ek avokado of ’n groen groente eet, die kleur meer groen as geel is. Anders as wat ons verwag het, ruik haar doeke glad nie sleg nie – blykbaar een van die vele voordele van borsvoeding.
Ons het gou agtergekom dat ons deur baie doeke ’n dag gaan – soms selfs 12 per dag. Ons moet meermale haar doek voor en ná ’n voeding ruil. Familielede en vriendinne het al genoem dat hul baba slegs een vuil doek per dag gehad het en dus was ons baie onseker of so baie doeke normaal is. Ons het egter die geregistreerde verpleegster en vroedvrou wat vir ons voorgeboorteklasse gegee het, gekontak, en sy het ons gerusgestel dat dit heeltemal normaal is. Ook met haar opvolgafspraak by die pediater op twee weke het hy benadruk dat elke baba verskil!
Ek het gou geleer dat dit nie nodig is om angstig te raak oor die klein dingetjies nie en dat elke baba uniek is.
LUCINDA LOURENS (29) VAN PRETORIA
My twee kinders, Liam (2) en Sophia (1 maand) se doeke het snaaks genoeg baie dieselfde gelyk. Die swart meko nium in die begin was wel iets om aan gewoond te raak! Maar binne drie tot vier dae het dit verander na ’n mosterdgeelkleurige doek met wat soos klein saadjies gelyk het daarin.
Liam, my oudste, se stoelgange het stelselmatig verander van geel doeke na ’n sagte, bruin stoelgang toe ons met vaste kosse begin het op die ouderdom van ses maande.
Party stoelgange was die kleur van die kos wat hy geëet het, soos wortels, beet of spinasie.
Sophia, my pasgeborene, het drie dae ná haar geboorte met ’n vyf- dag-kursus antibiotika begin. Dít het haar magie lekker omgekrap en sy het effense groen doeke gekry. Dit het gelukkig vinnig na normaal toe teruggekeer nadat ek haar ’n hoë dosis probiotika gegee het.