HOEVEEL POEF?
MIN POEF
As baba se stoelgang hard en droog is, of klein en rond soos ’n bokkie of haas se mis, is hardlywigheid gewoonlik die sondaar. Onthou, borsbabas is selde hardlywig. Borsmelk is baie gekonsentreerd en bykans alles kan deur die baba se liggaam geabsorbeer word – daarom kan borsbabas dae lank sonder ’n vuil doek wees.
Volg hierdie raad as jou baba se magie nie wil werk nie. Onthou om nie al hierdie wenke op een slag op die proef te stel nie: • Gee hom ekstra vloeistof soos water. • Gee hom pruimedantsap, maar hou in gedagte dat party babas krampe daarvan kan kry. • Gee ’n gliserien-setpilletjie.
BAIE POEF (DIARREE)
As dit slymerig, loperig en geel, wit of groen van kleur is, het jou baba moontlik diarree. Poef wat uitspuit kan ook ’n teken van diarree wees.
Kom onmiddellik by ’n dokter uit as jou pasgeborene se stoelgang herhaaldelik so lyk of as sy skielik baie meer as gewoonlik poef,
aangesien dit ’n simptoom kan wees van gastroënteritis, ’n ernstige siekte wat selfs tot die dood kan lei as ’n baba nie gou genoeg behandeling kry nie.
GENOEG POEF
Hoewel baie babas ’n stoelgang ná elke maaltyd het, is dit beslis nie die reël nie. Drie stoelgange tydens ’n enkele voeding – een kort nadat hulle begin drink het, een in die middel van ’n drinksessie en een kort daarna – is net so normaal.
Hoeveel stoelgange genoeg is, hang af van die soort melk wat jou pasgeborene kry. Só verskil borsbabas en bottelbabas se poef en poefgewoontes: BORSBABAS Jy het dalk al gehoor ma’s praat van agt vuil doeke op een dag of een vuil doek elke agt dae. Dit is beslis nie net ’n storie nie. Dokters en susters bevestig dat ’n borsbaba enigiets van agt vuil doeke per dag tot een vuil doek per week kan hê. Borsbabas se poef ruik nie sleg nie, maar dit is lekker morsig, aangesien dit baie los is en maklik regoor die hele lyfie beland. BOTTELBABAS ’n Baba wat bottel drink se stoelgang het ’n groter verskeidenheid
kleure, teksture en reuke as dié van hul maters wat moedersmelk kry. Hul poef verskil ook van dag tot dag, selfs al het julle nie die formule verander nie. Die tekstuur is meestal soos dié van tandepasta. Die algemene reël is een stoelgang per dag om ongemak te voorkom. Die stoelgang van ’n baba op koeimelkformule is gewoonlik geelbruin. En as daar yster bygevoeg is, is dit dikwels donkergroen.
Hou in gedagte dat jou baba se stoelgangroetine waarskynlik sal verander as sy minder gereeld begin drink, vaste kos begin eet, of siek is.