SLAAP EN JOU PASGEBORENE
WAT OM TE VERWAG
Jou pasgebore baba het ’n ongelooflike hoeveelheid slaap nodig. In die eerste twee weke van sy lewe sal hy waarskynlik lang rukke aanmekaar slaap voor hy wakker word om te voed. Jy sal hom dalk selfs wakker moet maak om te drink, en die uitdaging sal minder wees hoe om hom langer te laat slaap as hoe om hom wakker genoeg te kry om goed te drink!
Pasgebore babas het hul slaap nodig en kan realisties gesproke net 45 minute op ’n slag wakker bly. Jy kan verwag dat jou pasgeborene snags net so dikwels wakker sal word vir ’n voeding as gedurende die dag.
HANTERINGSPROBLEME
DAG-NAG-OMRUILING As jou pasgeborene in die nag dikwels wakker word en huil en bedags meer slaap, is dit moontlik dat hy dag en nag verwar. Hanteer dit deur jou baba aan te moedig om bedags meer dikwels te voed en die tye tussen nagvoedings uit te rek. Maak hom bedags ten minste elke drie tot vier uur vir ’n voeding wakker. As hy genoeg gewig aansit, gesond is en jy nie oor sy groei bekommerd is nie, kan jy hom snags los om jou wakker te maak.
Binne ’n paar weke behoort jou baba dan in die loop van die dag gereeld vir sy voedings wakker te word en snags vir minstens een skof langer te slaap.
BLITSSLAPIES As jou baba ná net 15 minute wakker word, beteken dit hy word wakker voor hy diep begin slaap. Wanneer babas van ligter na dieper slaapfases beweeg, trek hul spiertjies skielik saam. Dit gebeur met volwassenes ook, maar die meeste volwassenes slaap daardeur. Dit kan jou baba egter wakker maak. Keer so dat jou aapstert ontwaak: • Draai hom knus in ’n kokon toe om die rukbeweging te keer. So sal hy nie sy arms uitstrek en daarvan wakker word nie. • Witgeraas sal hom help om dieper
te slaap. • ’n Swaarder babaslaapsak sorg vir diep druk, wat jou baba kan help om ’n bietjie dieper te slaap. • Hou jou hand op jou baba tot die skrikrefleks gekom en gegaan het en hy dieper slaap.