AGGRESSIEWE KIND
My vyfjarige seuntjie is vreeslik aggressief teenoor sy boetie en eintlik al ons gesinslede. Ek is bang daar is iets fout waarvan ek nie weet nie, dalk iets wat by die skool gebeur het. Wat kan ek doen om die aggressie stop te sit?
MADELEIN KOEN ANTWOORD: Aggressie is een van die eerste reaksies wat ’n baba aanleer om uiting aan sy frustrasie te gee. Slaan, stoot, gryp en byt kom algemeen onder babas en kinders voor wanneer hulle nog nie op ’n gepaste manier woordelikse uiting aan hul gevoelens kan gee nie.
Kinders beskik nie altyd oor die vermoë om konflik op ’n sosiaal aanvaarbare wyse te hanteer nie. Hy kan moontlik worstel met ’n stresvolle lewensgebeurtenis of emosionele reguleringsprobleme. Genetiese faktore kan ook ’n rol speel. Dis baie belangrik om die oorsaak van die aggressie te bepaal en te hanteer.
Ouers kan die volgende strategieë volg om aggressiewe kinders te ondersteun:
1 STEL FERM GRENSE. Kinders moet weet watter gedrag is toelaatbaar en wat nie. ’n Kind wat skop, byt of slaan moet dadelik aangespreek word. 2 WEES KONSEKWENT. ’n Ouer kan nie een dag negatiewe gedrag ignoreer en ’n volgende dag op die kind skree nie. 3 ALTERNATIEWE GEDRAG. Moedig jou kind aan om woorde te gebruik eerder as fisieke, aggressiewe gebare. Stel ook ’n positiewe voorbeeld in die manier waarop jy as ouer aggressie hanteer.
4 MOENIE “TAAIHEID” AANMOEDIG NIE. In sommige gesinne word aggressie aangemoedig, veral by seuns. Dit kan ’n gevoel by die kind skep dat hy moet skop en slaan om goedkeuring te kry.
5 KOMMUNIKEER MET ROLSPELERS. Bepaal so of jou kind by die skool of elders ook aggressief optree. 6 FOKUS OP DIE HANDHAWING VAN ’N POSITIEWE
VERHOUDING. Wanneer ouers slegs op negatiewe gedrag fokus, kan dit kinders meer opposisioneel laat optree. Probeer dus steeds fokus op jou kind se positiewe eienskappe en prys hom vir goeie gedrag.
As sy aggressie steeds nie verbeter nie, is dit wys om professionele hulp in te roep. Indien die oorsaak van die probleem nie betyds vasgestel word nie, kan ’n kind in ’n skadelike patroon van negatiewe gedrag verval. Vir kinders so jonk as vyf kan ’n speltareut help om hom te leer om sy emosies gepas uit te druk.