10 beste stimulasie-speelgoed
’n Speelding is nie net prettig nie, dit help ontwikkeling ook aan. ’n Kenner deel haar keuse van speelgoed vir kleingoed.
1TEKSTUURBOEKE
Boeke met interaktiewe elemente soos verskillende teksture en venstertjies bied stimulasie vir ogies en vingers. Die band tussen julle versterk as julle saam ’n interaktiewe storie lees en jou baba se aandag word behou, sê die Britse spel- en masseerterapeut Emma Sodeke.
2BOUBLOKKIES
Jou kleinding leer van oorsaak en gevolg as jy haar help om ’n toring van blokkies te bou en haar dan toelaat om dit plat te slaan, sê Emma. “Dis wanneer sy begin besef dat sy die mag het om haar omgewing te verander. Blokkies wat inmekaar pas ontwikkel weer fyn motoriese vaardighede.”
3SPEELTELEFONE
Babas is versot op katoeters, veral dié met knoppies en goed wat ’n geraas kan maak of wat liggies het wat flits. Speelgoed wat volwasse toerusting soos telefone en skootrekenaars naboots is ook gewild, sê Emma. “Dit moedig rolspel aan, ontwikkel verbeelding en leer jou kind meer oor kleure, getalle en woorde.”
4POPPE EN TEDDIEBERE
Poppe en teddiebere kan jou baba leer hoe om koesterend op te tree, te vertroos en sagkens te speel, sê Emma. Wys jou peuter hoe om die pop te sus en te koester en sy sal jou naboots.” Dit is ook uitstekend vir seuns en leer jou kind empatie.
5KRYTE
As jou kind ’n lekker dik kryt vashou – selfs al krabbel sy net daarmee – ontwikkel haar knypgreep. Dis ’n fyn motoriese vaardigheid wat haar duim en wysvinger betrek en uiteindelik help met voeding sowel as potloodvaardighede.
6STOOTSPEELGOED
Jou baba sal heerlik onafhanklik voel as sy ’n speelding kan rondstoot wat haar kan help loop, sê Emma. Kies een met ’n stewige basis wat haar kan help om haar in ’n staande posisie op te trek en haar beenspiere kan versterk.
7SIT- EN-RYKARRETJIES
As jou baba haar self vorentoe dryf op ’n sit- en-ryspeelding soos ’n plastiek-motorfietsie, ontwikkel sy haar been- en kernspiere. Dit help haar ook om haar balans- en groot motoriese vaardighede te verbeter.
’n Pop of teddiebeer leer jou kind – seuntjies ook – koesterende gedrag en om empatie te voel en te wys.
8VORMSORTEERDER
Vormsorteerders is uitstekend vir die verbetering van probleemoplossings- en fyn motoriese vaardighede aangesien sy die verskillende vorms moet optel en dan moet uitwerk watter een sy deur watter gaatjie moet druk.
9TEESTEL
“’n Teestel moedig jou baba aan om haar verbeelding met speel- speel- speletjies in te span,” sê Emma. “As sy boonop saam met maatjies ’n ‘teeparty’ hou, verbeter dit ook haar sosialiseringsvaardighede.”
10SPEELMAT
’n Speelmat bied die ideale geleentheid vir magietyd, wat help om jou baba se nek- en armspiere te versterk, sê Emma.