Superkoel sake met
Die Johannesburger Lisa Koppel (32), meer bekend as Lisa K, is ’n superkoel en sexy ma van twee seuns, maar ook die kranige sakebrein agter die skatlike Running Bear-babaskoenreeks.
WAAR HET JOU PAD MET RUNNING BEAR BEGIN?
Die handelsnaam is grotendeels geïnspireer deur my seun Jayden (nou amper 3 jaar oud). Ek het gesukkel om vir hom skoene te kry wat stylvol, gemaklik en funksioneel was, en terselfdertyd goed vir sy ontwikkeling. Running Bear is sagte leermokassins wat kaalvoet loop naboots en help om die spiere en ligamente te versterk.
Dis vir my belangrik om ’n produk te skep waarop ek trots kan wees as my kind dit dra, daarom kies ons geen kortpaaie in ons produksie van hoëgehalte-skoene nie.
MA EN SAKEVROU: HOE KOMBINEER JY DIE TWEE?
Jayden was twee toe ek skoene begin maak en ontwerp het. Om ’n besigheid te begin is nooit maklik nie, veral nie as jy agter ’n kleutertjie moet aanhardloop terwyl jy self swanger is nie!
My jongste, Kyle, is nou sewe weke oud en ek het geleer dat goeie tydsbestuur absoluut noodsaaklik is om die daaglikse uitdagings van ’n werkende ma wees die hoof te bied.
Die hulp van vriende en familie maak ook die las baie ligter. Omdat ek van die huis af kan werk en tyd saam met my kinders kan deurbring, kan ek daardie spesiale oomblikke saam met hulle geniet en niks daarvan misloop nie.
WAT IS DIE LEKKERSTE VAN JOU WERK?
Running Bear is eintlik die perfekte huwelik tussen my skoenfetisj en my liefde vir kinders! Dis heerlik om te kan werk in ’n bedryf waaroor ek passievol is.
Ek is ook mal oor kinders en dis vir my lekker dat my tyd buigsaam is sodat ek ’n deel aan my gesin kan afstaan en ’n deel aan my besigheid. Ek glo as ’n mens passievol is oor wat jy doen, dit deur alles skyn en in alle aspekte van jou besigheid wys.
JY IS EINTLIK ’N GEKWALIFISEERDE ADVOKAAT
... Ek praktiseer nie meer as advokaat nie. Ek het dit drie jaar lank gedoen, maar toe Jayden gebore is, het my prioriteite en lewe verander. Ek wou meer van my tyd daaraan wy om hom groot te maak en te sien grootword en het nie gevoel my beroep bevorder my ma-wees nie.
As die eienaar van Running Bear is my tyd meer my eie. Aan die ander kant help my regskennis elke dag as dit kom by kontrakte en in onderhandelings met verskaffers en kliënte.
HOE BELANGRIK IS DIT OM JOU HANDELSNAAM GOED TE VESTIG?
Om ’n handelsnaam op te bou, kos baie moeite: jy moet mense sover kry om by jou produk aanklank te vind en so verlief daarop te raak dat hulle dit bo die kompetisie se produk kies. Daarom het elke aspek van die handelsnaam gedetailleerde aandag nodig.
Ek het Running Bear van niks af nie geskep, van die logo, die sagte katoensakkie en die webtuiste tot die verpersoonlike boek wat elke paar skoentjies gratis vergesel.
Ek het net besef dat dit alles in die detail lê. Mense waardeer die fynere afronding, wat my aanmoedig om net meer kreatief te raak en aan te hou om my handelsnaam verder uit te bou.
JY IS GETROUD MET DIE SANGER DANNY K. HELP DIT JOU ONDERNEMING DAT JULLE ’N GLANSPAARTJIE EN GEREELD IN DIE KOLLIG IS?
Ja, dit help beslis, want ons het die voordeel van groot sosialemedia-platforms. Dit help om Running Bear uit te brei, want dit bied die voordeel van groter bewustheid deur publisiteit. Dit gee ons beslis ’n voorsprong. Ek het natuurlik ook die voordeel dat ek Danny se bemarkings- en besigheid servaring kan inspan!
WATTER WAARDES IS VIR JOU BELANGRIK IN JOU BESIGHEID EN TUIS?
Omgee en eerlikheid is twee baie belangrike waardes waarvolgens ek probeer leef en wat ek ook vir my kinders wil leer. Ek glo dat albei daardie waardes ook krities belangrik is as jy ’n suksesvolle onderneming wil bedryf.
WAT IS DIE BELANGRIKSTE EIENSKAPPE VAN ’N MA-ENTREPRENEUR?
Veerkragtigheid, geduld en die vermoë om te kompartement a lis eer speel’ n sleutelrol in jou vermoë om jou as ma- entrepreneur te handhaaf.
SOU JY IETS ANDERS AANGEPAK HET?
As ek terugkyk, is ek nie spyt oor enigiets nie. Om my regsgraad te kry en as advokaat te praktiseer is iets wat ek altyd sal hê en waarop ek baie trots is, maar ek glo dit is die grootste geskenk as jy jou passie kan uitleef. Ek was gelukkig genoeg om my passie uit te leef in Running Bear, wat genadiglik ’n sukses was. Volg jou passie en sukses sal gewoonlik daarmee saamkom.