KAN EK MET MY PASGEBORENE REIS?
V
Ons reis elke jaar na my suster in die Ooste. Is dit veilig dat my een maand oue baba saamvlieg? Kan ’n mens maar met so ’n klein baba na ’n ander land gaan? A
DR. H.P. VAN DER MERWE ANT
WOORD: Weens toenemende globalisering het reisgeneeskunde ’n spesialisveld geword en is dit belangrik dat reisigers ingelig is oor die gesondheidsgevare in die deel van die wêreld wat hulle wil besoek. Daar is verskeie reisklinieke wat inligting daaroor kan verskaf.
Dis egter nie ’n goeie plan om ’n internasionale reis met ’n maand oue baba te onderneem nie.
Hoewel jy jou baba waarskynlik borsvoed en die teenliggaampies in jou bloed jou baba ’n mate van beskerming teen sekere siektes gee, is die gevaar van komplikasies te groot as ’n baba van hierdie ouderdom siek word. Stel jul reisplanne liewer ’n ruk uit.
Babas van een maand oud is nog nie geïmmuniseer teen ernstige siektes wat wêreldwyd voorkom nie en dis moeilik om blootstelling aan dié siektes in onbeheerde omgewings soos lughawens en vliegtuie te vermy.
Komplikasies van seisoensiektes soos griep en brongiolitis kan ook katastrofiese gevolge vir jong babas inhou. Daar is ’n malariagevaar in sekere Oosterse lande en hoewel klein babas voorkomende middels moet inneem, kan dit makliker newe- effekte veroorsaak.
Sekere Oosterse lande het ook ’n hoë voorkoms van hepatitis A en babas kan eers van een jaar oud af daarteen geïmmuniseer word. Inenting teen seldsame siektes soos Japannese ensefalitis is ook eers op ’n later ouderdom gewens.
Dan is daar ook streeksgebonde siektes in die Ooste wat nie deur immunisasie voorkom kan word nie.
In ’n neutedop beveel ek dus aan dat julle nie met ’n maand oue baba Ooste toe reis nie. Stel die reis liewer met minstens ’n jaar uit.
Kontak ’n mediese reiskliniek minstens twee maande voor jul vertrek om te hoor watter moontlike immunisasies en voorkomende behandeling nodig is, afhangende van waarheen julle reis.