Liewe Baba & Kleuter
Hagar’s Choice is ’n plek van veiligheid vir babas en klein kindertjies in die Kaap. Hoewel die saadjie om na babas om te sien reeds lank gelede geplant is, het ons gesin – ek en my man, Thinus, en ons drie kinders – Hagar’s Choice in 2014 as ’n tuisskool-gemeenskaps projek begin met die tema “doen iets moeiliks”.
Binne twee weke het ons die eerste baba ontvang wat kangaroe moedersorg nodig gehad het, en ons was van die begin af gek daaroor. Ons eerste baba was vroeggebore en het net 1,25 kg geweeg. Binne ’n week het ons nog ’n baba ontvang en nie lank daarna nie nog ’n versoek om ’n derde baba te huisves wat al twee keer weggegooi is. Van daar af het dit nooit weer opgehou nie. Ek het gou besef dis ’n roeping van die Here.
By Hagar’s Choice maak ons voorsiening vir drie kategorieë: pleegsorg (waar kinders vir langer tye by ons kom bly ), kangaroe moedersorg( vir babas tot twee maande ou dindi e aannemings ven stertyd waarin besluit word of hulle na hul biologiese ouers of na aanneemouers gaan) en veiligheidsorg (waar die kinders omhul eie veiligheid sonthalwe verwyder is ). Al drie kategorieë het hul eie tydraamwerk en kriteria, soos die wag vir aanneemouers of op die rehabilitasie van biologiese ouers. Genadiglik het ons maatskaplike werkers wat al die wetlike aspekte hanteer.
Daar is al 56 kinders onder ons hande deur. Ons het al babas gehad wat in asblikke gevind is en kinders wat uit dwelmhuise geneem is. Die nood is so groot en daar is nie baie mense wat dit doen nie.
Soveel kinders moet noodgedwonge in hul moeilike huislike omstandighede bly omdat daar nie alternatiewe blyplek vir hulle is terwyl hul ouers hulp kry nie.
Toe ons eers besef het hoe groot die behoefte is, het ons besluit om Hagar’s Choice met alle erns aan te pak en as ’n niewinsgewende organisasie te registreer. Die registrasie was net ’n formalisering van wat ons reeds besig was om te doen.
Hagar’s Choice het ons harte heeltemal verander. My man sê altyd as jy hom 10 jaar gelede vertel het hy sou soveel babas so oneindig liefhê, sou hy gelag het. Ons is geseënd met ons kinders: ons dogters is natuurlike versorgers, maar my seun het my regtig beïndruk. Hy was ’n tiener toe ons begin het, maar het gou geleer hoe om ’n baba toe te wikkel, winde uit te vryf en te vermaak.
Ons het gou besef die koestering werk albei kante toe: vir die gewer én ontvanger.
Om as gesin saam te werk aan Hagar’s Choice is ’n voorreg. Ons is nie vrywilligers of personeel wat vyfuur huis toe gaan nie, maar ’n gesin wat ons uitgebreide gesin versorg. Ons het wel ’n paar ondersteuners wat ons gereeld kom besoek en met ons dogtertjies of seuntjies kom speel of ander dienste lewer. Soms het ons uitstappies en die hele uitgebreide gesin gaan saam.
Dis nie vir ons ’n besigheid nie. Om ons babas en kinders uiteindelik te laat gaan, is die moeilikste deel van ons werk.
Kinders bring egter uitgawes en Hagar’s Choice het gereelde finansiële bydraes dringend nodig. Oor die laaste paar jaar het ons begin besef dat dit waarlik ’n gemeenskap kos om ’n kind groot te maak. Ons kan dit nie alleen doen nie.
Maandelikse skenkings, geldelik sowel as op ander maniere, is welkom en ons het ook van tyd tot tyd gespesialiseerde dienste nodig soos om funksies te reël of drukwerk te doen.
Ons gebruik ons gesondheid s kos verspreidings onderneming H is Working Hands om ’n inkomste te genereer. Jy kan ons produkte direk by ons koop of op ons webtuiste. Deur His Working Hands te ondersteun, ondersteun jy ook Hagar’s Choice se babas. Ons sal enige ondersteuning en hulp waardeer. Gaan loer gerus op ons web- of Facebookblad as jy meer inligting soek oor hoe jy betrokke kan raak.
Ons glo ons is geestelike broeikaste vir babas en kinders. By ons kry hierdie kinders net ’n bietjie meer liefde, sagkense versorging en gebed voor hulle hul lewensreis elders voortsit. Die lewe is moeilik en elke bietjie motivering wat ons vir hulle kan gee, maak ’n verskil. Hulle is immers ons toekomstige leiers.
Groete Barbara Campher Medestigter van Hagar’s Choice