1SIT

Jou baba behoort tussen ses en nege maande oud onafhanklik te begin sit. Voor sy kan sit, is dit belangrik dat sy eers die nodige spiertjies bou wat dit vir haar moontlik maak om regop te bly en haar balans te handhaaf. Doen die volgende oefeninge met jou kleinding om haar te help.

OEFENBAL Plaas jou baba op haar magie op ’n groot oefenbal en rol die bal stadig in verskillende rigtings terwyl jy haar vashou – dit sal haar balans oefen.

Beproef die volgende oefening as jou baba al met steun kan sit: Laat haar op die bal sit terwyl jy haar stadig vorentoe, agtertoe en kante toe wieg sodat sy haar lyfie daarby moet aanpas om haar balans te handhaaf. Hou haar heupe ferm vas.

MAGIETYD Versterk die spiertjies deur jou baba so gereeld moontlik op haar maag neer te lê en aan te moedig om haar kop op te lig sodat sy haar nek- en rug-

spiere kan oefen. Laat haar op haar magie op jou maag lê terwyl julle met mekaar gesels, of sit haar op die grond neer en lê voor haar en gesels.

WYS HOE Hierdie oefening werk van omtrent vier maande af: Sit plat op die vloer met jou bene wyd oop voor jou. Plaas jou baba tussen jou bene sodat sy met jou ondersteuning in die sirkel van jou arms en jou lyf kan “sit”. Plaas haar handjies voor haar op die grond sodat sy kan sien hoe dit haar help om haar balans te hou. IN ’N BOKS Tel jou kleinding in ’n boks of mandjie met kussings agter en aan die kant om haar te ondersteun. Moet haar nie alleen laat nie, maar sit by haar en gesels. Sit speelgoedjies neer waarna sy kan reik – dit ontwikkel ook haar spiere en help haar om haar balans te verbeter.

SKOOTSPELETJIES Sit op ’n stoel met jou kleinding op jou knieë terwyl sy na jou kyk en jy haar handjies vashou. Kantel haar baie effens sywaarts deur jou knieë te beweeg sodat sy haar lyfie daarby moet aanpas. Verbeter ’n ouer baba se balans deur haar op jou knie te hou terwyl jy “hop, perdjie, hop” speel. EKSTRA STERK Goeie rompbeheer is belangrik vir al jou baba se groot motoriese mylpale. Dié oefening is geskik vir babas van ses maande oud af: Tel jou baba op en hou haar onderstebo vas met haar gesig wat weg van jou wys. Jou voorarm moet dus horisontaal oor jou lyf en jou kind se lyf strek aan die bokant van haar bobene. Hou met jou ander arm jou kind se bene vas, wat nou uitgestrek en min of meer teen jou skouer behoort te wees. Draai nou jou voorarm sodat jou duim nader aan jou maag beweeg en druk jou baba effens teen jou vas. Jou baba sal probeer om regop te kom – amper soos ‘n “sit-up” – en haar kop op te lig. Aanvanklik sal sy net haar kop kan lig, maar namate haar rompbeheer verbeter sal sy haar bolyf oplig. Doen dit elke dag.