3 TOT 4 JAAR

Jou kleuter kan nou ’n bal vang op ’n afstand van 1,5 meter, dit bons en met sy elmboë gebuig gooi. Hy kan lekker op ’n klimraam klouter, gly en swaai, wat sy groot spiere sommer baie goeie oefening sal gee. Hy kan sonder hulp uit ’n hurkende posisie regop kom. Hy galop, hardloop, loop, wriemel en kan op sy tone loop. Hy kan al sowat vyf keer op een been wip en vyf sekondes op een voet balanseer, asook met albei voete vorentoe spring. Hy ry kort entjies met sy driewiel.