Kom ons wees maatjies
Jou kleuter leer by die kleuterskool hoe vriendskap werk, maar oefen gerus tuis saam met hom aan sy sosiale vaardighede.
POSITIWITEIT
Dis vir ons as ouers glad nie maklik nie, maar ons moet ons kinders toelaat om situasies waarin hulle ongemaklik voel of te na gekom word, self te hanteer. Moenie ’n te groot ophef daarvan maak nie. Wys empatie, maar help jou kind eerder deur self vriendelik en opgeruimd te wees.
Herinner jou kind dat mense nie van nors en ongelukkige mense hou nie. Wys hom daarop dat wanneer hy kla of neul mense minder geneig is om aan sy behoeftes te voldoen: “As jy kla omdat jy tweede moet gaan, gaan Mia minder lus wees om met jou te speel.”
GOEDHARTIGHEID
Een van die belangrikste sosiale lesse wat jy jou kleuter kan leer is om vir ander mense om te gee. Herinner jou kind gereeld daaraan dat mense nie in hom gaan belangstel as hy nie in hulle belangstel nie. Moedig nuuskierigheid aan deur vrae te vra oor jou kind se omgewing en mense.
Wys hom deur jou eie vriendskappe dat daar baie pret en liefde uit maats te put is. Help hom deur hardop oor sy maatjies te wonder: “Ek wonder of Emma ook van popspeel hou?”, of “Dink jy Luan is ook lief daarvoor om boeke te lees?”.
MEDEDEELSAAMHEID
Leer jou kind om te deel, maar leer hom ook hoe om te onderhandel wanneer hy met iets wil speel waarmee ’n maatjie speel. Sê: “As jy nou vir Ella toelaat om met jou pop te speel, kan ons later ’n entjie gaan fietsry.”
Mededeelsaamheid is belangrik by die kleuterskool tydens speeltyd, in vriendskap en later in verhoudings.
VRYGEWIGHEID
Begin deur jou kleuter aan te moedig om ’n ekstra toebroodjie vir sy maatjie by die skool te neem of pluk ’n blommetjie om saam te neem wanneer julle na ’n speelafspraak genooi is.
Leer h omdat gesond een langtermynvriendskappe gebaseer i sop min of meer gelyke dosisse van gee en neem. So sal jou kind sommer vinnig ontdek dat dit lekkerder en veel meer lonend is om te gee as om te ontvang.
LUISTERVERMOË
Hierdie vaardigheid is een van die belangrikes; daar is mos niks so aantreklik soos iemand wat goed kan luister nie!
Leer jou kind om ander kinders ’n kans te gee om te praat en om te luister wanneer hulle praat, veral as jou kind meestal ’n gesprek oorheers of sy maatjie in die rede val. Die maatjie gaan later belangstelling verloor en ophou praat.
PASOP VIR TÉ EERLIK WEES
Daar is ’n fyn grens tussen eerlikheid en iemand se gevoelens seermaak. Jou kind moet die een of ander tyd leer dat ’n mens liefs nie té eerlik moet wees nie. Jy kan die proses aanmoedig deur hom te vra hoe hy sou voel as iemand iets leliks vir hom sou sê.
Dit is ook ’n goeie idee om te verduidelik daar is goed wat jy mag dink (soos byvoorbeeld dat sy maatjie se voete sleg ruik), maar wat jy nie mag sê nie, want dit sal sy maatjie se gevoelens seer maak.
VRIENDSKAPPE EINDIG
Die een dag is Christiaan sy beste vriend en die volgende dag Jaco. Kleuters se vriendskappe is kortstondig en jou kind sal vinnig agterkom dat vriendskappe soms tot ’n einde kom, al is dit hoe pynlik.
Moedig jou kind aan om oor sy gevoelens te praat, want kinders is baie sensitief vir verwerping. Hy verstaan dalk nie hoekom Jaco nie meer met hom wil speel nie, maar hy kan daaroor praat. Onthou om erkenning aan sy gevoelens van woede en verlies te gee.
Soms gebeur dit dat jy ’n vriendskap nie goedkeur nie, maar moenie sleg praat van jou kind se maatjie nie. Stel eerder ’n alternatiewe speelmaatjie voor.