Skitterskoon
Moet jy regtig jou baba se bottels en fopspene elke keer voor gebruik steriliseer? Watter manier werk die beste? Ons beantwoord jou vrae oor sterilisasie.
In die eerste jaar of twee van jou baba se lewe speel bottels ’n belangrike rol in sy voeding (selfs al borsvoed jy) en daarom moet jy weet hoe om dit behoorlik skoon te hou ten einde jou aapstert teen siektes te beskerm.
En dis nie net jou baba se bottels wat supersindelik moet wees nie – alles van foppies en spene tot borspomponderdele en selfs bekertjies en lepeltjies moet in die eerste maande gesteriliseer word.
TOT WATTER OUDERDOM?
Die meeste kenners stem saam dat voedingstoerusting in die eerste ses maande áltyd gesteriliseer moet word.
Ander beveel aan dat jy daarmee aanhou tot jou baba ’n jaar oud is, omdat hy dan al genoeg van sy eie teenliggaampies kan maak om infeksie te beveg. ’n Derde groep meen sterilisasie is nodig tot jou baba glad nie meer bottel drink nie.
As jy wel ná ses maande ophou om jou baba se bottels te steriliseer, moet jy baie seker maak dat jy steeds ál sy voedingstoerusting baie deeglik met warm water en seep was.
WAT MOET EK ALLES STERILISEER?
Alle voedingstoerusting moet in die eerste ses maande gesteriliseer word. Dit sluit in jou borspomp, fopspene, bottels, spene, botteldoppies en -skyfies, tepelskerms (indien gebruik) en die tangetjie waarmee jy die bottels en spene hanteer.
EN DIE SKOTTELGOEDWASSER?
Al was jy jou baba se benodigdhede in die skottelgoedwasser, moet jy dit steeds agterna behandel omdat die meeste skottelgoedwassers nie warm genoeg word om die toerusting te steriliseer nie.