WAT PAS JOU DIE BESTE?
MIKROGOLF-STERILISEERDER
Tap ’n bietjie water onder in die steriliseerder, pak die babatoerusting in volgens die vervaardiger se aanwysings en plaas dit vir die aanbevole tyd in die mikrogolfoond. Moenie dit oorlaai nie en maak seker die eenheid kan dig toemaak.
Sterilisasie duur drie tot agt minute. Stoom kan uit die steriliseerder ontsnap en jou brand as jy dit oopmaak voor dit klaar afgekoel het; wees dus versigtig. VOORDELE Dis vinnig en maklik om te gebruik en ’n taamlik goedkoop opsie, want ná jou aanvanklike aankoop betaal jy net vir die krag van die mikrogolf. NADELE Sommige mikrogolf-steriliseerders is handelsnaam-spesifiek, wat dit moeilik maak om dit vir ander toerusting te gebruik.
CHEMIESE VLOEISTOF
Dis baie maklik om chemiese middels soos Milton, Sterilon en Dettol Sterilon te gebruik. Al wat jy nodig het, is ’n klein emmertjie met ’n deksel en ’n dryfplaat om die bottels onder water te help hou, water en die chemiese oplossing. Met Milton moet jy die water elke 24 uur vervang, terwyl die Sterilon-oplossing elke sewe dae vervang moet word.
Sterilisasie met Milton duur 30 minute, en met Sterilon 10 minute. Maak seker dat die babatoerusting volledig onder die water is en dus oral met die sterilisasie-oplossing in aanraking kom. Was die houer deeglik met seep en water elke keer wanneer jy die oplossing vervang. VOORDELE Jy kan dit op enige plek gebruik en het nie elektrisiteit nodig nie – dit is dus ideaal vir kamp. Jy kan dit ook gebruik vir dele van borspompe wat dalk nie in die mikrogolf gesteriliseer mag word nie. Jy kan die toerusting in die oplossing laat lê tot net voor jy dit gebruik. Dit verniel nie die babatoerusting soveel as hitte nie. NADELE Sommige babas kry sproei van sekere chemiese steriliseerders. Dis ’n voortdurende uitgawe omdat jy gereeld nuwe sterilisasiemiddels moet koop. Sommige oplossings verkleur die spene effens as jy dit te lank daarin laat lê. Jy kan nie metaal so steriliseer nie.
SELFSTERILISASIE-BOTTELS
Hierdie opsie behels dat jy ’n bietjie water op die boom van die bottel tap, die speen bo-op plaas, die bottel bo met ’n doppie seël en dit ’n paar minute in die mikrogolf plaas – lees die vervaardiger se aanwysings om te sien wat die aanbevole tyd
per bottel is. Soms kan jy ook ’n fopspeen daarin sit.
VOORDELE Jy kan die bottel gou steriliseer net voor jy dit moet gebruik. Jy het geen ander sterilisasietoerusting nodig vir bottels nie, en kan dus maklik op enige ander plek steriliseer.
NADELE Jy kan net bottels so steriliseer, en sal steeds jou ander toerusting op ’n ander manier moet behandel.
ELEKTRIESE STOOMSTERILISEERDER
’n Losstaande elektriese stoomsteriliseerder kan gewoonlik ses tot agt bottels en spene steriliseer. Maak seker jy pak dit volgens die anwysings en met die bottelopening na onder. Die eenheid behoort dit binne agt tot 20 minute te steriliseer.
VOORDELE Jy kan gewoonlik die bottels in die steriliseerder bêre. Dis altyd beskikbaar omdat dit al is waarvoor jy dit gebruik.
NADELE Dis duur en net geskik vir waar jy elektrisiteit het. Dis soms handelsnaam-spesifiek en dan kan jy nie ander bottels daarin steriliseer nie. Nie alle dele van sommige borspompe kan so gesteriliseer word nie.
KOOK
Plaas ’n groot kastrol op die stoof en pak al die voedingstoerusting daarin. Bedek dit met koue water en maak seker daar is geen lugborrels in die bottels nie. Plaas ’n deksel op en bring tot kookpunt. Laat minstens vyf minute kook. Laat die water afkoel voor jy die bottels met ’n gesteriliseerde tangetjie uithaal.
VOORDELE Dit word deeglik gesteriliseer en jy kan dit op bykans enige plek doen, selfs oor ’n oop kampvuur. Dis die maklikste manier om metaalvoorwerpe te steriliseer.
NADELE Dis omslagtig. Daar is die gevaar dat jy jou kan brand. Dit kan die lewensduur van bottels en spene verkort.