Bind met jou baba
’n Pasgeborene se sin vir aanraking is uiters belangrik vir ontwikkeling. Sy is op haar gelukkigste en gesondste wanneer sy bindingstyd saam met haar ouers deurbring met die hulp van vel-tot-velaanraking. Wat sê die wetenskap oor aanraking?
Nie net weet elke ma daar is krag in ’n drukkie nie, geleerde navorsers het dit ook oor en oor bevind. “Baie studies wys dat wanneer ’n ma onmiddellik ná haar baba se geboorte veltot-vel-aanraking met hom het, die baba meer tevrede en kalm is. Sy temperatuur, hart- en asemhalingstempo en sy bloedsuikervlak is meer stabiel as dié van ’n baba wat nie dieselfde aanraking met sy ma het nie,” sê Erica Neser, ’n internasionaal gesertifiseerde laktasiekonsultant, opgeleide voorligter en skrywer van How Babies and Toddlers Really Sleep.
Erica verduidelik dit is ’n baba se sensoriese persepsie van sy ma – die bekende klank van haar stem en hartklop, die ritme van haar asemhaling en veral haar reuk, wat hy danksy die vrugwater ken – wat hom verseker dat hy in ’n veilige omgewing is. Dít maak jou baba rustiger en help hom om makliker te stabiliseer.
Vel-tot-vel-aanraking reg ná die geboorte laat ’n baba toe om dieselfde “gesinskieme” te kry wat ’n pasgeborene se immuniteit verhoog, verduidelik Hettie Grove, ’n geregistreerde verpleegkundige en vroedvrou van Gauteng.
Hierdie gesonde bakterieë wat op jou vel voorkom, help om jou baba later in sy lewe teen ongesonde bakterieë te beskerm.
Vel-tot-vel-aanraking is ook goed vir ma’s, sê Hettie. Dit help om die goedvoelliefdeshormoon oksitosien vry te stel, wat op sy beurt weer jou stres verminder. Studies wys dat ma’s wat onmiddellik ná die geboorte vel-totvel-aanraking met hul baba gehad het, ook minder met oorvol borste gesukkel het.
DIE GOUE UUR
Ma’s of pa’s en hul baba moet in die eerste uur ná die geboorte waar moontlik vel-tot-velaanraking geniet.
Michelle Walton, ’n doula en terapeutiese refleksoloog van Johannesburg, verduidelik dat die “goue uur” ná geboorte noodsaaklik is omdat pasgeborenes in hierdie tyd nege fases deurloop.
“Daarom kan dit wat in die eerste uur gebeur, ’n lewenslange uitwerking op die baba hê,” sê Michelle, wat die onderneming BirthRite bedryf.
Die goue uur is boonop goeie nuus vir borsvoeding, sê Hettie. “Jou baba kan voed so gereeld as wat hy wil. Dit verhoog die aantal voedings, wat die melkvoorraad vir later begin regkry.”
RUSTIG BY BABA
Bly in die eerste weke tuis sodat jy op jou baba verlief kan raak, is Hettie se raad.
“Dit is waaroor die eerste ses weke gaan. Die idee is dat jy op jou baba verlief raak en uitpluis hoe jou baba jou laat weet hy wil voed, slaap of speel.” DRA JOU BABA Binding met jou baba word aangehelp as jy hom in ’n drasak naby jou liggaam dra, sê Hettie. Hy is na aan jou hart en word in ’n kokon teen jou liggaam gekoester. Hy word deel van die ritmiese bewegings van jou lyf, en julle is in voeling met mekaar se behoeftes. DIE GOUE AANRAKING Babamassering is nog ’n kragtige manier om baba-ouerbinding te versterk, sê Lisa Townend, ’n babamasseringsinstrukteur wat deur die Internasionale Vereniging van Babamassering gesertifiseer is. “Julle ruik mekaar, jul oë is op mekaar gerig, jy bied versorgende aanraking, julle hoor mekaar se stem en boots mekaar na,” verduidelik Lisa, wat die praktyk Holistic Baby in Kaapstad bestuur waar ouers geleer word om met die hulp van massering met hul pasgeborenes te bind.
Meer nog, babamassering kan ook help om toestande soos koliek, refluks, winde, hardlywigheid, swak slaapgewoontes, ooren onderproduksie van hormone, ongebalanseerde afskeidings, tandekry of gevoeligheid vir aanraking te verlig.
Daarby het dit ’n positiewe invloed op jou baba se welstand, sê navorsers van die Warwick-universiteit in Engeland. Hulle het bevind dat babas wat gemasseer is, minder huil en beter slaap omdat hulle meer van die
Gesonde bakterieë van ’n ma se vel help om baba te beskerm teen ongesonde bakterieë later in sy lewe.
slaaphormoon melatonien in hul bloed het.
Hierdie babas se bloed bevat ook minder van die streshormoon kortisol as die bloed van nie-gemasseerde babas, het die navorsers bevind.
As massering vir ’n gesondheidstoestand ingespan word, moet dit uitgevoer word deur ’n erkende gesondheidsversorger soos ’n chiropraktisyn of geregistreerde masseerterapeut. As dit egter by massering met binding as doelwit kom, is die pasgeborene se ouers die beste kandidate, sê Lisa.
“Vermy dienste wat die baba namens jou wil masseer. Massering bou ’n band tussen jou en jou baba en daarom is jy die beste mens om dit te doen.”