LEES IS PRET!
Hier is ’n rak vol boeke waarmee jy jou kleuter voor slaaptyd kan bederf.
PRET OP DIE AFRIKA-TREIN
Die apies se dieretrein is ’n opwindende kinderstorie met lekkerlees- rymende teks en kleurryke illustrasies. Olifant reis oor Afrika na Kokosneutbaai op sy stoomenjin en laai langs die pad ’n rits diere op. Die illustrasies beeld Afrika-diere in al hul glorie uit, en daar is ook soek-en-vindgeleenthede. NB Uitgewers, R190.
NOI SE VRIEND
Die Stormwalvis is ’n pragtige verhaal met ewe besonderse illustrasies wat dié boek ’n gunsteling in die huis sal maak. Die oulike seuntjiekarakter, Noi, is eensaam en vind op ’n dag ná ’n groot storm ’n jong walvis op die strand. Hy maak ’n plan om die walvis te versorg én die tweetjies word groot maats. Protea Boekhuis, R150.
GOEIENAG
In Die groot blom stap Dylan en Palesa saam met Palesa se pa skool toe. Die twee maats sien ’n baie hoë sonneblom in ’n klein tuintjie. Hulle reken dié blom sien alles. Ná hul eerste opwindende skooldag loop hulle weer saam-saam huis toe. Hulle sien weer die sonneblom, wat dié keer in ’n ander rigting kyk. Hierdie boekie speel af in Johannesburg en het die mooiste beskrywings van die middestad met sy wolkekrabbers. As jou kind onlangs grootskool toe is, sal sy die boek baie geniet. Dis ideaal vir beginnerlesers, want die teks is groot en die helder illustrasies gedetailleerd. NB Uitgewers, R140.
SOEK EN VIND
Soek-soek inkleurboek: Op die plaas, In feetjieland en Diere is inkleurboeke vir kinders wat jou kind aanmoedig om spesifieke voorwerpe, diere en allerhande ander dinge te vind. Jou kind moet eenvoudige opdragte volg om die regte prent te soek en dan met die regte kleur in te kleur. Geskik vir viertot sewejariges. Human & Rousseau, R65 elk.
BEHULPSAME MEISIE
In hierdie eg Suid-Afrikaanse storie, Nyambura wag vir die bus, wag Nyambura by die bushalte en sien allerhande gebeurtenisse wat haar aan haar gogo herinner. Dis ook by die bushalte waar sy goeie dade vir ander verrig. Jou kleuter sal allerhande lesse leer, soos hoflikheid en behulpsaamheid. Liefde en ’n mens se verhouding met jou naasbestaandes is nog ’n belangrike tema. Jacana Media, R120.
LIEFSTE HEKSIE
Liewe Heksie en die sterretjieskombuis wat deur die bekende Verna Vels geskryf is, bly nou maar eenmaal ’n treffer! In hierdie storie veroorsaak Liewe Heksie dat een van haar dak se sinkplate afwaai. Sy kry onverwags ’n geheimsinnige gas en die twee kuier te lekker onder die sterre terwyl hulle in Liewe Heksie se kombuis melk drink. Maar wie is die gas en waarheen verdwyn sy die volgende oggend vroeg? NB Uitgewers, R125.