KONSENTRASIE ...
WATTER KONSENTRASIE?
As jou kind net wil speel en nie kan konsentreer nie, kan daar verskeie oorsake wees, sê die opvoedkundige sielkundige dr. Arina Lanser.
Seuntjies is gewoonlik meer geneig om te wil speel as leer, maar daar kan ook ernstiger oorsake soos ’n ontwikkelingsagterstand wees. Jou kind kan dalk ook nie die basiese perseptuele vaardighede hê wat nodig is om formeel te leer nie, en kan daarom nie by die res van die klas hou nie.
(Perseptuele vaardighede sluit in dat hy ’n voorwerp teen ’n besige agtergrond kan uitken, voorwerpe van mekaar volgens hul vorm kan onderskei, en so aan.)
Ander moontlike oorsake van konsentrasiegebrek sluit in ’n gebrek aan dissipline en roetine tuis, swak luistervaardighede en toestande soos aandaggebreksteurnis en aandaggebrek-hiperaktiwiteitsteurnis.
HOE GOED MOET ’N GRAAD O’TJIE KAN KONSENTREER?
Vyf- tot sesjariges behoort 10 tot 15 minute op ’n slag te kan konsentreer.
“Dit verg kreatiwiteit van die onderwyseres en as die aanbieding eentonig of vervelig is, sal die kleuters gou belangstelling verloor,” sê Arina.
Een manier om dit te keer, is om aktiwiteite af te wissel en om kinders te help om ná ’n blaaskans weer te fokus.
“Kinders verskil en hul konsentrasie hang in ’n groot mate van hul belangstelling in die aktiwiteit af,” vertel Arina.
“As ’n aktiwiteit byvoorbeeld ’n halfuur lank aangebied word, behoort dit met iets prettigs of ’n blaaskans afgewissel te word. Die ideaal is vier sessies per uur van 15 minute op ’n slag by verskillende tafels.”
Moenie onrealistiese verwagtinge koester nie, want dit kan jou kind gespanne en angstig maak. Weet wat sy potensiaal is en wat jy van hom kan verwag.
Laastens moet jy jou kind beslis later in die jaar ’n skoolgereedheidstoets laat ondergaan, sê Arina. “Onthou ook, hy het genoeg tyd nodig om te speel!”
EK’S BANG MY KIND WORD TERUGGEHOU
Soms is ’n kind intellektueel gereed vir graad 1, maar emosioneel nog nie heeltemal daar nie.
“Dis egter belangrik om te bepaal of sy emosionele agterstand te wyte is aan onrypheid, trauma en of dit net deel van sy persoonlikheid uitmaak,” sê Arina.
“As jou kind van nature skaam of teruggetrokke is, sal nog ’n jaar in graad O nie regtig ’n verskil maak nie. As hy getraumatiseer is, kan terapie help.”
Volgens Arina word kinders dikwels onnodiglik teruggehou, veral seuns wat in die tweede helfte van die jaar verjaar.
“Dit kan hulle oorgereed maak en ook ouderdomsgroep-probleme in sport veroorsaak.”
Kinders wat met reg teruggehou word, is dié wat heelparty agterstande het en gewoonlik ook ’n meegaande mediese geskiedenis.
Indien nodig, kan jy ook ’n ander leeromgewing soos ’n tuisskool oorweeg.