V& A Borsvoeding

Moet ek in die eerste weke ná my baba se geboorte tepelskerms gebruik? Ek wil nie hê my tepels moet so bars soos my vriendin s’n nie – dit het darem baie seer gelyk.

LISANNE DU PLESSIS ANTWOORD: Daar is twee belangrike eerste stappe tot suksesvolle borsvoeding wat ook bors- en/of tepeltrauma kan voorkom. Dit is eerstens die korrekte vashou (posisionering) van die baba en tweedens hegting aan die bors. Jy kan jou baba op verskillende maniere vashou, en julle twee kan self besluit wat vir julle gemaklik is en wat die beste werk. Die basiese riglyn is dat jy gemaklik sit of lê en jou baba dan na jou lyf toe bring. Moenie na jou baba afbuk om te borsvoed nie, want dan gaan jou rug seer word en jou baba kan aan die tepel “hang”, wat dit seer kan maak of laat bars. In die algemeenste wiegieposisie moet jy en jou baba só naby aan mekaar wees dat julle met jul mae teen mekaar geposisioneer is. Jou baba moet op haar sy lê en haar gesiggie moet na jou bors kyk. Hierna moet jy jou bors aanbied. Moenie oorhaastig wees nie. Kielie jou baba se bolip met jou tepel tot sy haar mondjie wyd oopmaak. As jou baba nie haar mondjie lekker wyd oopmaak nie, kan die bors uitglip en jou tepel seerkry. Sodra die mondjie wyd genoeg oop is, moet mamma gereed sit met haar bors. Jou baba het goed geheg wanneer haar kennetjie en neusie teen jou bors vasdruk, haar onderlip uitkrul en ’n groot deel van jou bors (die tepel en donkerder areola) in haar mondjie is. As jou baba goed geposisioneer is en goed heg en jou tepels steeds seer word, kan ’n tepelskerm as ’n laaste uitweg gebruik word eerder as dat jy ophou borsvoed .’ n Tepels kermis’ n dun, buigsame silikoon bedekking wat jy voor borsvoeding oor jou tepelarea plaas. Dit lyk amper soos ’n deurskynende bolhoedjie. Sommige kenners is egter bekommerd dat dit borsvoeding sleg beïnvloed as daar ’n voorwerp tussen jou baba se mond en jou bors is. Daarom is die algemene raad dat fopspene, bottels, bottelspene en tepel-skerms in veral die eerste kritieke dae ná die geboorte vermy moet word. As jy besluit om ’n tepelskerm te gebruik, moet dit vir so ’n kort as moontlike tydperk gedoen word. Moet liewer nie enige soort room aan ’n seer tepel smeer nie. ’n Lanolienroom kan by die apteek gekoop word, maar is dikwels duur. ’n Nuttige wenk om tepels gesond te hou of te genees, is om ná ’n voeding ’n druppel borsmelk uit te druk en dit aan die tepel te smeer. Borsmelk het antibakteriese en ander eienskappe wat ’n seer tepel kan behandel.