WAT KAN VERKEERD LOOP?

INFEKSIE

Infeksie van die vrugwater en vliese kom selde voor, maar dit kan veroorsaak dat jou water te vroeg breek en jou baba vroeg gebore word.

“Soms kan die infeksie volg op vliese wat te vroeg geskeur het. Dit is dus baie belangrik dat as jou water breek, slegs jou dokter ’n inwendige ondersoek doen en slegs wanneer hy of sy dit noodsaaklik ag,” sê JP.

In baie gevalle is daar geen simptome nie en dokters vermoed eers ’n infeksie wanneer hulle agterkom dat jou én jou baba se hart te vinnig begin klop.

Enige verandering aan die reuk van jou vaginale uitskeiding moet onmiddellik met jou dokter bespreek word, want dit kan ook op ’n infeksie dui.

VRUGWATER- EMBOLISME

Dit gebeur wanneer vrugwater of fetusafval jou bloedstroom binnedring. Dit is baie gevaarlik, want dit kan ’n mens se hart en longe ineen laat stort weens ’n suurstoftekort en tot geweldige bloeding lei.

Dis gelukkig ’n baie seldsame komplikasie.

MIN VRUGWATER

Dit kan gebeur dat die vrugwater minder is as wat dit in ’n bepaalde stadium van swangerskap behoort te wees.

As jou swangerskap al taamlik ver gevorder is – tussen 36 tot 37 weke – is die veiligste behandeling die geboorte van jou baba.

As jy minder as 36 weke swanger is, sal jou ginekoloog jou baba se gesondheid fyn dophou.

Vrugwaterproduksie is ’n uiterse belangrike aanduiding van jou ongebore baba se welstand en dokters gebruik dit ook as ’n manier om te bepaal hoe goed die plasenta werk, sê JP.