BEHANDELING:

WAAR LÊ DIE PROBLEEM?

Die behandeling van jul keuse hang minder af van hoeveel geld julle bereid is om uit te gee as van wat die oorsaak van jul onvrugbaarheid is, sê Jaco.

As jy byvoorbeeld endometriose het, is die antwoord om hierdie toestand te behandel.

In die geval van ’n man hang dit daarvan af of die probleem by sy hormone of sy testikels lê. Sekere hormoonprobleme kan met hormoonbehandeling gemanipuleer word, terwyl die oplossing vir testikulêre probleme in vitro-bevrugting is.

As toe buise of langdurige, onverklaarbare onvrugbaarheid die probleem is, is die keuse in vitro-behandeling.

INSEMINASIE VS. IN VITRO- BEVRUGTING

Inseminasie is heelwat goedkoper, maar dit het ’n suksessyfer van ongeveer 1 uit 10. Jaco sê hulle bied dit net gewoonlik aan vir mense waar die kans op sukses groot is. Dit sluit meestal in mense wat jonger as 35 is, nog nie lank sukkel nie, al ’n vorige baba gehad het en waar die man se semenontleding normaal is en die vrou nie buisprobleme het nie.

“Inseminasie is egter in alle gevalle ondergeskik aan in vitro-bevrugting. In vitro-bevrugting is verreweg die ingryping met die hoogste suksessyfer vir almal wat nie hul kans met ’n operasie of behandeling kan verhoog nie,” sê Jaco.

“Onvrugbare vroue se kans om danksy in vitro-bevrugting swanger te raak, is meer as dubbel die kans van ’n spontane swangerskap by ’n normale, vrugbare paartjie.”

Baie pasiënte wat op ander maniere nie kon swanger raak nie, kan met in vitrobevrugting gehelp word. Sowat 10 persent van paartjies wat om hulp kom aanklop, kry uiteindelik in vitro-behandeling.

BEVRIESING VAN EIERSELLE

As jy teen 35 jaar oud nog nie planne het om swanger te raak nie, maar wel eendag ’n kind wil hê, moet jy verkieslik ’n vrugbaarheidspesialis raadpleeg om eiersel-bevriesing te bespreek.

“Vroue se eiertjies word deur die jare ál minder en die gehalte neem ook af. Die eiertjies van iemand ouer as 36 vries ook nie so goed as ’n jonger vrou s’n nie,” maan Jaco.