BAIE UNIEKE TWEELING
Toe Evan byna ’n jaar oud was, wou ons graag nog ’n kind hê. Ek het heelparty kommerwekkende simptome opgemerk soos haarverlies, aknee, ’n abnormale siklus en gewigstoename.
Ná verskeie toetse het die ginekoloog polisistiese ovariumsiekte (PSOS) gediagnoseer, wat die kans op swangerskap baie skraal maak.
Die nuus was ’n skok. Ons het oor die situasie gebid en besluit om op God te vertrou vir ’n wonderwerk.
Maand ná maand was die teleurstelling groot. My man, Kevin, het een aand ’n helder droom gehad van twee babas in blou kombersies. Ons het saam in verwondering oor die droom gelag.
’n Paar maande later het ’n swangerskap in ’n vroeë miskraam geëindig.
Nog twee weke later het ek pal olik gevoel en nadat geen medisyne wou help nie, is ons vir die soveelste keer na Pathcare vir bloedtoetse. Teen daardie tyd het die personeel ons al by die naam geken.
Kevin het die bloeduitslae gaan haal. Ek was swanger!
Ons is terug na my ginekoloog, waar hy ’n sterk hartkloppie op die ultraklank gesien en gesê het ek is vyf weke swanger.
Ek en Kevin was so bly ons kon natuurlik swanger word. Ná die afspraak het ons in die motor gesit en vir God dankie gesê terwyl ons die sonarfoto’tjie bestudeer het.
Kevin het my aan sy bloukombersiesdroom herinner en ons het geweet dat dit net ’n droom was. Ons was opgewonde om ’n gesonde baba te kon sien groei.
Op 11 weke is ek met rugpyn huisdokter toe, en het uit pure nuuskierigheid gevra of hy sommer daar in die spreekkamer ’n ultraklank kon doen.
Toe die dokter skerp na die skerm staar en my lêer nader trek, het ek begin bekommerd raak.
Hy het allerhande vrae gevra oor my swangerskap en uiteindelik die skerm na my gedraai. Daar, op die skerm, was twee besige babatjies duidelik sigbaar!
Ek was uit die veld geslaan. Ons het dan een dooiersakkie met ’n babahartkloppie gesien en hier is twee babas!
Ons ginekoloog het later verduidelik dat dit ’n baie seldsame verskynsel is omdat die een baba vyf tot sewe dae ná die ander een verwek is. Die verskynsel word oorbevrugting genoem en is baie ongewoon.
Albei babas het goed gegroei, alhoewel een kleiner as die ander was.
Ons unieke tweelingseuns, Colin en Nathan, is op 2 Mei 2012 gebore. Ons is ongelooflik dankbaar.
In 2016 is ons vierde seuntjie, Chad, gebore.
Ons het dus ’n baie bedrywige huishouding, maar ’n huis vol liefde en dankbaarheid!
As ’n paartjie is ons passievol om ander te bemoedig wat met vrugbaarheid sukkel. Mag hierdie getuienis aan baie mense hoop bring. CHANTELL DAVIS OOS LONDEN, OOS K A AP