GESONDHEID ná die RONDHEID
Ná jou swangerskap sal jy jou lyf weer van voor af moet leer ken. Daar’s goeie nuus – en slegte nuus...
AGGE NEE, AKNEE!
Swangerskap kan sommige vroue se aknee vir ewig oplos. As die oorsaak van jou aknee polisistiese ovariumsiekte of ’n androgene (manlike) hormoonpatroon is, kan dit tydens jou swangerskap herstel. Nog goeie nuus is dat dit dan ook gewoonlik nooit terugkeer nie.
As die aknee egter die gevolg van familiële metaboliese sindroom is, sal die aknee ná ’n ruk terugkeer.
Sommige vroue sal weer ná swangerskap weens androgenisasie (vermanliking) met aknee begin sukkel. Gee drie tot ses maande ná die bevalling kans – dan kan ’n hormoonprofiel gedoen word om te kyk of antiandrogene soos Diana of Jasmine voorgeskryf moet word.
REKMERK, STREKMERK?
Swangerskap stel groot eise aan jou vel, want jy sit vinnig gewig aan. Dr. Paul Skoll, ’n plastiese chirurg van Kaapstad, sê ’n rekmerk is ’n skeur in die dieper vlak van die vel omdat die vel nie elasties genoeg is om so baie en so vinnig te rek nie. Hy sê daar is geen room wat dit kan keer of uitwis nie.
Die beste raad van Baba & Kleuter
lesers is om nie onnodig gewig op te tel nie en jou steeds maar te vertroetel met ’n lekker roompie, want dit laat jou beter voel, lyk en ruik, en help teen die gejeuk wat ook so tipies is tydens swangerskap.
Ongelukkig is sommige mense maar net meer tot rekmerke geneig as ander. Dis darem gelukkig meestal op plekke wat ’n mens nie gereeld ontbloot nie. Baie vroue met ’n positiewe ingesteldheid sê hulle dra hul rekmerke met trots, want dis ’n bewys van die wonder van vrouwees.
BASTA BUUSTE!
Ja, jy’t gedink jy weet waarvoor jy borste het, nè? Tot hulle hul ware funksie openbaar: om jou baba te voed. Gelukkige vroue se borste is ná swangerskap en borsvoeding weer presies soos dit altyd was. Baie vroue kla egter dat hul borste agterna kleiner is en nie meer so ferm nie.
Dis nie aan borsvoeding te wyte nie, maar aan jou borsweefsel wat versag het terwyl jy swanger was. Jy sal ook verskille aan die areola en tepel sien, maar soms keer hulle na hul vorige voorkoms terug.
Daar is nie veel wat jy kan doen aan die verlies van grootte en fermheid nie. Jy kan oefeninge doen om die onderliggende spiere sterker te maak, maar die bors self bestaan uit vet en borsweefsel en kan dus nie reg ”geoefen” word nie. Rome wat die vel fermer laat voel bestaan, maar die uitwerking is tydelik. As dit jou baie pla, kan jy kosmetiese chirurgie oorweeg.
VET OP SY PLEK
Dis seker die heel algemeenste klagte van nuwe ma’s: daardie rolletjie maagvet wat nie wil wyk nie.
Tydens swangerskap skei die maagspiere en hulle keer nie noodwendig na hul oorspronklike posisie terug nie. Oefening en geduld is vir ’n jaar nodig.
As jy jou oorspronklike gewig terug het en steeds voel jou maag is uit verhouding, kan jy ’n chirurg raadpleeg. ’n Minimaagverkleining behels dat oortollige vel verwyder en dat die onderste deel van die spiere weer aanmekaargewerk word.
Maar dis drasties en net iets wat jy moet laat doen as jy heeltemal seker is dat jy nie nog kinders wil hê nie.
Sommige van die veranderinge wat jou swanger lyf ondergaan, is permanent. Raadpleeg die dokter as dit jou pla.
SIKLUS-OMWENTELINGE
Wat menstruasie betref, is die eerste drie tot ses maande ná die bevalling ’n herstelfase waarin jou menstruasie ongereeld kan wees – of heeltemal afwesig as jy borsvoed. As jy ná ses maande nog nie weer begin menstrueer het nie, moet jy die ginekoloog raadpleeg.
Dis ook algemeen dat jou menstruasie swaarder of ligter kan wees as voorheen, veral terwyl jou hormone nog deurmekaar is. Die goeie nuus is dat endometriose-lyers se menstruele probleme dikwels ná hul swangerskap verbeter.
BOEPIE EN BRIL
Yolandé Prinsloo, ’n oogkundige van Hermanus, sê sommige swanger vroue hou so water terug dat hul kornea swel. Dit kan die refraksie van die oog verander en hul sig beïnvloed. Dit kan ook die ronding van die kornea verander en sy sensitiwiteit beinvloed sodat die oog minder trane maak, albei dinge wat ’n mens se vermoë om te sien kan aantas.
Yolandé sê sy sien dikwels dat swanger vroue se oë verswak, party s’n permanent. Wag ’n paar maande ná jou swangerskap voor jy jou oë laat toets, en borsvoed ook eers klaar.
VERLOOR JOU KROON
Alle mense se hare val soms uit, maar dit kan deur swangerskap aangewakker word. Die tekstuur van jou hare kan ook verander, want die haarwortel is afhanklik van wat dit gevoer word. Haarverlies hou verband met tiroïedwanfunksie en ’n afname in yster – want baie vroue word bloedarmoedig tydens en ná hul swangerskap. As jou hare baie uitval, sal jou dokter waarskynlik ’n ysteraanvulling aanbeveel. Swangerskap sal jou egter nie pankop maak nie. As dit so erg is, is daar ander oorsake.
NUWE SKOENE
Dis nie ongehoord dat jy tydens jou swangerskap ’n groter nommer skoen moet aanskaf nie. Onthou, van die gewig wat jy aansit gaan sit ook in jou voete, en die vog in jou liggaam word ook anders versprei. Jou ligamente is daarby slapper.
Meestal keer jou voete na normaal terug, maar soms bly dit ’n nommer groter – wat ’n fantastiese verskoning om die winkels in te vaar en ’n nuwe skoenversameling aan te skaf ...
PIEPSPROBLEEM
Elke swangerskap laat sy spore. Die bekkenvloer doen skade op en die blaas word aangetas. Drangurie, wanneer jy voel as jy nie nou by ’n toilet uitkom nie gaan jy jou natmaak, herstel byna altyd. Gewoonlik is stres-inkontinensie, waar jy urine lek as jy hoes of nies, ook verbygaande.
Gee minstens ses maande ná die swangerskap kans voor jy mediese of chirurgiese ingryping oorweeg. Werk intussen aan daardie allerbelangrike kegel- oefeninge!