DIÉ POPPE MAAK KINDERSPELETJIES VAN DIVERSITEIT-BEWUSTHEID
Die meeste dogtertjies hou van ’n pop. Maar wat as die pop nie soos sy lyk nie?
Dit was die probleem waarmee Nondumiso Gogela gesit het toe sy vir haar dogter ’n pop as present wou koop. Nêrens kon sy in die winkels ’n pop kry waarmee haar kind sou kon identifiseer nie.
En net daar is die saadjie geplant vir Imibongo kaMakhulu, ’n tuisbedryf in die suidelike voorstede van Kaapstad wat bruin en swart lappoppe met etniese haarstyle maak.
“Ek het my dogter se eerste pop gemaak van oorskietlap wat ek in die huis gehad het,” vertel Gogela. “Ek het foto’s daarvan aan vriende gestuur en byna dadelik het van hulle laat weet hulle soek ook sulkes.”
Kort hierna, in Maart 2019, het Gogela, wat in die modebedryf was, haar maatskappy gestig: Imibongo kaMakhulu. Dit is Xhosa vir “ouma se dankbaarheid”.
Imibongo kaMakhulu was onlangs ’n wenner in ’n entrepreneurskap-kompetisie van die TV-kanaal VIA (DStv-kanaal 147). Ses klein tot middelslag-ondernemings het elkeen advertensie- en lugtyd op
VIA en advertensieruimte in Media24 se tydskrifte en koerante gewen – die waarde van dié entrepreneurskapveldtog beloop altesaam R3 miljoen.
Vandag vervaardig Gogela se maatskappy ’n volledige reeks lappoppe met sagte lyfies en klere waarmee kleuters kan identifiseer. Die stylvolle popklere wissel saam met die seisoen – vir die somer is daar byvoorbeeld poppe in sonrokkies, kortbroekies en speelpakkies.
So gewild is Gogela se poppe dat sy skaars kan voorbly. Poppe word op bestelling gemaak en aangepas vir spesifieke voorkeure. Daar is selfs ’n lappop vir seuns, ’n geslagsneutrale konyntjie en meerminne in pragtige blou shweshwe-lap.
En so maak Imibongo kaMakhulu se poppe kinders speel-speel bewus van diversiteit.
Bestel jou pop by die webwerf imibongokamakhulu.co.za, of klik op SHOP en besoek een van die verskaffers wat daar gelys is.