UMFAZI OBEMABELEMADE
Kudlule iqhawekazi lomzabalazo umfazi obemabelemade encelisa ngisho nabangaphesheya komfula Angaba yidlozi lokubuyisana kwaboHlanga njengoba namaqembu aphikisayo emtusa
‘ BENGI de ngizincweba ngizihlola ukuthi ngiyaphila yini ngoba akujwayelekile ukuthi umuntu atuswe kangaka esaphila.” Lawa ngamazwi kamufi uMama uNomzamo ukaMadikizela awasho ngonyaka owedlule emuva kwezinkulumo zezimenywa ezahlukahlukene ezazihambele isiphihli somcimbi wakhe wokubungaza iminyaka engama-80 edla anhlamvana. Isikhulumi nesikhulumi sasimtusa ngokukwazi ukubekezela, ukumela iqiniso, ukungazilahli izingane zakhe neqembu lakhe i-African National Congress (ANC) ebuhleni nasebubini. Lapho abenyathela khona ububonakala umehluko uma esedlulile ngoba ubengahlonizi ngokukhuluma iqiniso njengoba linjalo.
Labo asebeneminyaka emide beyiziNtatheli zezepolitiki bazokhumbula ukuthi empilweni yakhe, ngisho nangesikhathi esekuHulumeni ubezibambela mathupha uma kunemibuzo okumele ayiphendule, engaphathisi njengoba sekwejwayelekile ukuthi izikhulu zibe nabakhulumeni bazo. Emibuthanweni kaKhongolose neyezinyunyana kanye neyomphakathi nje abesuke emenywe kuyo ukuba ayokwethula inkulumo, ubedume ngokwenza isiqiniseko sokuthi abezindaba akabashiyi esikhaleni, kepha uyabanika ithuba lokucaciseleka ngemibuzo yabo. Nangesikhathi ebizwe phambi kweKhomishini Yamaqiniso Nokubuyisana esithangamini esasihleli eThekwini eminyakeni eminingi edlule ukuba azochaza ngeqhaza lakhe ezintweni ezithile, akazange ananaze ukunekela abezindaba bonke ubufakazi bakhe. Ukuba nguMama Wesizwe akuyona into ayithole ngoba nakhu enobuhlobo noMnu uNelson Mandela, kodwa kwaba imisebenzi yakhe yokufaka bonke abantu ngaphansi kwekhwapha lakhe. Ngeminyaka yama-1976 ngezibhelu zaseSoweto, nguyena owaphenduka ithemba lentsha eyayisinde esibhamwini samaBhunu. Wayephuma engena ehambela imindeni yentsha eyayishonile ehambela nalabo ababelimele. Wayekwenza konke lokhu edele izingane zakhe nomndeni wakhe uqobo. Ngesikhathi egubha usuku lokuzalwa eqeda iminyaka engama-80 ngonyaka odlule wathi,”Uma ngilulama into engizoyenza ukuhambela izintandane zaseMarikana nabafelokazi.” La mazwi wayewasho esezinhlungwini kodwa ngaphakathi efuqwa ugqozi nothando lwezingane nokuzwelana nabezifazane abalahlekelwa abayeni babo ngesikhathi kwehla isibhoconga saseMarikana. Konke lokhu kuwubufakazi bokuthi ubefukamele wonke umuntu kungakhathalekile ukuthi ukuliphi izinga lempilo. Ngaphambi kokuba uMama Wesizwe ukaMadikizela ubeyintombazane eyazalelwa eMbongweni eMbizana zingama-26 kuMandulo ngowe-1936.
Ezinsukwini ezimbalwa edlulile uqalile ukuzwakala uheleza umoya wobumbano kwaboHlanga eNingizimu Afrika okuyizinkomba zokuthi uMadikizela uyidlozi lobunye kwaboHlanga abebecindezelwe iminyaka ngaphambi kwenkululeko. UMama uMadikizela ushonele esibhedlela iMilpark, eGoli emuva kokuxinwa isigubhukane ukugula abevele ehamba nakho. Ugcine ukubonakala emphakathini enkonzweni yePhasika yebandla lakhe amaWeseli, eMeadowlands, eSoweto.
Abomndeni wakhe bathi basashaqekile ngoba nakuba ubebambekile kodwa ubezihambela njengoba waziyela nasenkonzweni futhi wayekade ephumile nangempelasonto yokubhalisela ukuvota ebukeka engcono empilweni. Eminyakeni engama-81 ayiphilile, eminingi yayo uyiphilise okwenyamazane nezingane zakhe emuva kokuboshwa komyeni wakhe uRolihlahla Mandela ngecala lokuvukela umbuso ekanye nabanye abaholi. Wayefana nebhola elalikhahlelwa noma yikanjani nguHulumeni wobandlululo namaphoyisa ezomoya. Ugcine engasenalo ikhaya eliqondile wayefakwa ngapha nangapha, eboshelwa ezindlini kungavunyelwa nanoma ubani ukuba asondele kuye. Amagalelo akhe ekuhlanganiseni aboHlanga nemihlambi eyalanayo kwezepolitiki azwakale kakhulu njengoba eselele kobandayo.
Uzofihlwa ngeSonto elizayo, ahlonishwe ngomngcwabo owenzelwa izikhulu eziphezulu zikaHulumeni ezweni ngokugunyazwa nguMengameli wezwe.
Kusukela kwehle lo mshophi emndenini wakwaMadikizela isililo sikhulu esigodini azalelwa kuso njengoba inxiwa lakwabo lisekhona nabanye bomndeni abayisizukulwane besaphila. Kulesi sigodi umndeni wakwaMadikizela uyahlonishwa ngoba ngisho nezingane ezisesemazingeni aphansi ezikoleni, ziyalazi iqhaza likaMama Wesizwe emzabalazweni. Umfowabo kaMadikizela omncane uthe bagqemeke engeqiwa ntwala ngodadewabo, kodwa bazogwinya yize kubaba. Abanye bomphakathi bathi bafe olwembiza ngokwedlula kwakhe emhlabeni bese benethemba lokuthi uzofihlwa khona endaweni ukuze nezizukulwane ezizayo zoyofunda ngomlando wendawo nokuthi kwake kwaba khona umuntu onjengaye. UMnu uThembani Screech ongowokudabuka esifundeni saseMbizana kodwa osezinze eGoli uthi bakhule uKaMadikizela ebekwa njengomuntu obekuthathwa njengecala ukuphatha igama lakhe, okungangokuba ngisho nokudlalela ngasemanxiweni alapho ayezalelwa khona babekusaba. Uthe ngokuhamba kwesikhathi esevuleke amehlo wabona ukuthi kwakuyinkoleloze yepolitiki njengoba namuhla imisebenzi yakhe emihle kubonakala ukuthi isiyamlandela. Ukudlula kwakhe kuyinselelo eqenjini elibusayo ngoba abaholi abakhona njengamanje kumele bathathe isihlangu sakhe baqhubeke lapho eshiye khona ngoba uhambe ekhala ngendlela le nhlangano esinhlakanhlaka ngayo.
NGAPHAMBI kokuba uMengameli uCyril Ramaphosa abikele isizwe ngokusemthethweni ngokudlula kukaMama uMadikizela, izindaba bese zisabalele okomlilo wequbula nabanye abaholi sebeqalile nokutheleka emzini wakhe beyobhonga emswanini. Abaholi abayizimbangi bamaqembu ehlukene ezepolitiki ikakhulukazi aboHlanga bashiye phansi ukungaboni ngaso linye bahlonipha leli qhawekazi. Kuhlalukile ukuthi aboHlanga zisekhona izinto ezibahlanganisayo ezibathintayo emoyeni nasemphefumulweni. Kuphinde kwavela nanokuthi ubandlululo nokucwaswa kwaboHlanga okwalwelwa nguMama uMadikizela azikapholi izilonda zakho kwaboHlanga nakuba sekuphele iminyaka engama-24 izwe labuyela ezandleni zabo ngakwezepolitiki.
UMama uMadikizela ubengumfazi omabelemade encelisa ngisho nabangaphesheya komfula. Isishoshovu somzabalazo esasibukela kuye ngezikhathi ezinzima zobandlululo uNkk uPatricia De Lille ungomunye wabaholi okuthe noma esegcogcome nezinhlangano eziningi, kepha ubuhlobo bakhe noMadikizela bebuhlala njalo buvuseleleka.
UNkk uDe Lille uchaze uMadikizela “njengophawu lweqiniso olungeke walunyakazisa”.
“Uyokhunjulwa njalo njengeqhawe elingagudluki kwelikholelwa kukho. Kunento eyodwa ebengimhloniphela yona, ukubekezela,” kusho uDe Lille.
Uthi njengoba abaningi ababenaye emzabalazweni sebendela koyisemkhulu, sekusemahlombe abo abasadla anhlamvana ukuthi baqhubeke lapho beshiye khona ukwenza isiqiniseko sokuthi umzabalazo wenkululeko abawulwela uzuzisa abantu baseNingizimu Afrika ikakhulukazi labo abasadla imbuya ngothi. Ubalule nezikhathi abazichitha ndawonye beqala ukungena ePhalamende ngowe-1994 bencokola ngokuthi bazokwenzenjani njengoba inqubo ababelwa nayo yabantu ababesePhalamende isingabo manje njengoba sekuyibona abaholi abasePhalamende.
Umholi weDemocratic Alliance (DA), uMnu uMmusi Maimane ube ngomunye wabaholi abaphambili abahlangene nabanye boHlanga emzini kaMadikizela nalapho kubonakale khona ubunye.
UMaimane uthi uMadikizela wenze umnikelo omkhulu endleleni ebheke empumelelweni yomzabalazo kuleli, ngakho uyadinga ukuhlonishwa noma eselandulele leli.
Uthe akanakho nokuncane ukungabaza ukuthi ukudlula kwakhe kushaye kwezwela emkhakheni wezepolitiki emaqenjini ngokwehlukana ngoba ubengumuntu oqonde kuhle kothi lomkhonto futhi elimele iqiniso. Uthi izwe lonke lilahlekelwe yileli qhawekazi somzabalazo wenkululeko.
Uthi uMadikizela ubehlala njalo ebabuyisela endleleni yingakho izigidi zabantu bakuleli zimkweleta ngokuzinikela kwakhe njengoba namuhla abantu bakuleli bazi ukuthi inkululeko yinto enjani. UMaimane uthe noma yena ekwelinye uhlangothi lwezepolitiki, kodwa uMama uMadikizela ubengenamahloni okukhuluma iqiniso.
Ukuba mabelemade kukaMama uMadikizela nokuncelisa ngisho nabangaphesheya komfula kufakazelwe nangumholi weEconomic Freedom Fighters (EFF) uMnu uJulius Malema obesondelene kakhulu naye nakuba esakhonjwa indlela kuANC. “Sichithe isikhathi esiningi emzini wakwaMandela sihlala khona, silala khona sidla khona. Emuva kokuzwa ngalesi sidumo sinikele kule ndawo ngoba sikwaze kahle lapho kuhlala khona uMama akekho osisize ngokusazisa indlela,” kusho uMalema. Uthe uMadikizela wayengaba uMengameli wezwe ukube akazange ahoxe ngomzuzu wokugcina ekungeneleni isikhundla seSekela Mengameli ngowe-1997 emuva kokubona ukuthi amavoti awamvuni. “Nguyena owayengabuyisa isithunzi sabantu abaMnyama.”
Ukukhula kwakhe akubanga lula ngoba ubunzima nobuhlungu waqala ukubuzwa esemncane. Ukudlula emhlabeni kukadadewabo omdala uVuyelwa owahlaselwa isifo sofuba ngenye yezinto eyamhlukumeza kakhulu emoyeni.
Akuphelanga sikhathi esingakanani esapholisa lelo nxeba unina wahlatshwa ukugula okwamqinisa naye wagcina ngokushona. Akumangazanga ukubona ukaMadikizela ephenduka isishabasheki somzabalazo ebhekana ngqo nezingqomondo zamadoda amaBhunu ngoba ekukhuleni kwakhe wayelazi usizi nokuhlupheka.