AMAKHOSI NOMTHETHO WESINTU
INKOSI iyona ethathwa njengesazimthetho futhi okumele ihlale njalo iyisibonelo esihle endleleni isizwe esiqhuba ngayo amasiko. Uma kukhunjulwa abadala besizwe abangasekho iyona iNkosi esuke iphambili uma kwenziwa isiko. Empeleni iNkosi ingubaba wabantu bayo, futhi okhokho bayo yibona ababheke inhlalakahle yesizwe sonke. Kusuka kudala amandla nemisebenzi yeSilo kwehlela eMakhosini njengokuthi iNgonyama kumele ibonisane naMakhosi okuyiwo amele abantu ngaphambi kokushaya umthetho. Noma yini iNgonyama noma iNkosi eyenzayo ehlose ukuthuthukisa isizwe, iyenza egameni lesizwe ngokugunyazwa uMkhandlu. UMkhandlu ungasho labo abasondelene neNgonyama noma iNkosi okungaba izinduna noma izinhloko zamakhaya abanye babo ubukhosi obusegazini kubo. INgonyama noma iNkosi ingumxhumanisi phakathi kwesizwe sayo nabantu bangaphandle okungaba ezinye izizwe noma amazwe.
Ngaphansi koMthetho WeSintu, abaholi bomdabu banikwe amandla okulalela baphinde bathathe izinqumo uma kusuke kunezikhalo emphakathini, kuthi labo abatholwa benamacala bathathelwe izinyathelo ezifanele. Esikhathini esedlule ubuholi bendabuko bebubambe iqhaza ezigabeni ezimbili okuyisigaba sikaHulumeni nesentuthuko. UMthethosisekelo wezwe uyabuqhakambisa ubuholi boMdabu neqhaza elibanjwa abaholi boMdabu futhi uyakugcizelela nokubaluleka kokuthi bahlale njalo bekhona abaholi boMdabu, inqobo nje uma behambisana nenqubo nenkambiso yawo. Kumele kwaziwe ukuthi uMthethosisekelo uqhakambisa kuphela ubuholi boMdabu njengohlaka nokusetshenziswa komthetho wesintu, futhi ucacisa nokuthi umthetho kazwelonke yiwona ongacacisa ngeqhaza lobuholi boMdabu njengesikhungo esingasebenza emiphakathini. Asikhumbule ukuthi ayikho inqubomgomo elandelwayo futhi efanayo emayelana neqhaza nokusebenza kwabaholi boMdabu.
Esifundazweni iKwaZuluNatal, ngaphansi koMthetho u-Act 5 wezi-2005 uqhakambisa iNgonyama njengephethe isizwe sonke, namandla ayo nemisebenzi yayo. Ngokwalo Mthetho iNgonyama kumele iwuhloniphe uMthethosisekelo nomthetho jikelele. Kumele ngaso sonke isikhathi igqugquzele ukubumbana nokuzwana esifundazweni nakuzwelonke, kube nesikhathi lapho izohlangana khona kanye ngonyaka nabanye abaholi boMdabu, yeseke iphinde ithuthukise imiphakathi ephethwe ngaphansi koBukhosi boMdabu, futhi iphinde igcobe aMakhosi.
INgonyama yiyo futhi emela uHulumeni wezwe emihlanganweni emikhulu kuleli nasemazweni angaphandle ezindabeni ezithinta ezendabuko. Ngaphansi kweSigaba 5 salo Mthetho abaholi boMdabu banesibopho sokuthi abantu ababaholayo bavikelekile ngaphansi koMthethosisekelo futhi banawo namalungelo akuMthethosisekelo njengelungelo lokukhululeka nokuzihlanganisa nezepolitiki. Kuyinkoleloze ukuthi abantu abahlala ezindaweni zaMakhosi bangabeqembu elithile. Uhlaka lobuholi boMdabu noHulumeni Basekhaya lungasebenza ngokubambisana nangokulingana ukugqugquzela uguquko esizweni, inqubekelaphambili nozinzo esizweni nasezweni lonkana.
Nokho ukungabikhona kwenqubo kazwelonke elawula ukusebenza neqhaza lababoli boMdabu kwenza kube nzima kubaholi bomdabu ukuba bazazi ukuthi bamiphi ngisho naneqhaza labo kukhona konke okwenzekayo ezweni. Lokhu kubahlupha kakhulu abaholi bomdabu futhi kudala nongabazane entuthukweni yemiphakathi yasemakhaya. Kukhona imibuzo ehlala njalo iqhamuka njengokuthi ubani onelungelo noma okumele athintwe ezindabeni ezimayelana nentuthuko yomphakathi, ubani onelungelo lokubiza imihlangano yomphakathi, ubani okumele abhekelele izikhwama ezimayelana nentuthuko nokuthi ubani okumele asho ukuthi intuthuko iya kanjani ezindaweni ezehlukene zomphakathi. AMakhosi nezinduna yibo abanesibopho sokulandela ukuthi umphakathi uziphethe kahle endaweni futhi nentuthuko awugcini ngokuyibukela kude kodwa iyafana nasezindaweni zawo. Laba banomsebenzi futhi wokuqinisekisa ukuthi kuba nokusebenzisana noHulumeni ekuletheni intuthuko nokuhlela futhi baneqhaza okumele balibambe ekuqinisekiseni ukuthi kusungulwa iNdlu Yobuholi BoMdabu (House of Traditional Leaders) ezingeni likazwelonke, ezifundazweni nasezingeni likaHulumeni Wezindawo.
Ngesonto elizayo sizobheka kabanzi ukususwa ezikhundleni zokuphatha kwabaholi boMdabu nezindlela ezilandelwayo.