Basola uMasipala ngezethembiso ezingekho
UKUPHAZAMISEKA kokusebenza eCity Hall eThekwini okwenzeke maphakathi nesonto lapho bekubhikisha khona amalungu oMkhonto Wesizwe kuwumphumela wezethembiso ezenziwa osopolitiki uma besaconsela amathe izikhundla. Lokhu kushiwo umholi weDemocratic Alliance (DA), KwaZulu-Natal uMnu uZwakele Mncwango kulandela uthuthuva olusuke ngaphandle kweCity Hall ngesikhathi abazibiza ngamasosha omkhonto bephoqa ukubonana nezikhulu bethi bafuna ukuqashwa njengoba babethenjisiwe. “UNkk uZandile Gumede wathembisa amasosha imisebenzi, imizi namathenda,” kusho uMncwango
Elinye lamalungu oMkhonto Wesizwe elingagunyaziwe ukukhuluma nabezindaba lithe, “Ngemuva kwesikhathi eside sithule silindele ukuthi uMasipala ufeze izethembiso zakhe, sibone ukuthi kubalulekile siziyele thina mathupha siyomisa konke okwenzekayo ukuze sinakwe ezimfunweni zethu esasithenjiswe zona. Maningi amalungu eMKMVA anamakhono kodwa awaqashiwe, awasebenzi, akukho ukusizakala ngokuthuthukiswa ngokwamabhizinisi, awekho amathenda esihlomulayo kuwo nokunye okuningi. Yiso lesi sizathu esenze ukuthi siyovala simise ukusebenza. Ukuvalela abasebenzi ngaphakathi kungezinye zezinto ebesizihlelile vele ukuthi sizenze ukuze sinakwe uma sifuna izimfuno zethu. Akuthina kuphela esifuna ukuhlomula kulokhu kodwa nabantu abasha siyabakhulumela, kukhona nabePAC ne-AZAPO.”
Liqhube ngokuthi ukuzithoba nenhlonipho yinto abaqeqeshwa yona embuthwen i kodwa bese siside isikhathi belindile bengazitholi izimpendulo. “Kusijabulisile ukuthi umasipala ukulalelile lokho ebesikufuna njengoba selukhishiwe uhlu lwezikhala zomsebenzi. Abantu sebezothumela izicelo zokuthola umsebenzi beqashwe. Lokhu kube yimiphumela yethu yokuziyela mathupha nokukhombisayo ukuthi bekungeke kwenzeke ukuba asiziyelanga khona,” kuphawula lelilungu.
Lesi siteleka sidale isiminyaminya emgwaqeni isikhathi esingaba ngamahora amabili, kwavalelwa abasebenzi boMkhandlu ngaphakathi kwaze kwasiza ukungenelela kwamaphoyisa. Imeneja yoMkhandlu weTheku iyile ukuyokwamukela izikhalo zamalungu oMkhonto weSizwe wabe esecela ukuthi anikezwe ithuba lokuthi ayolucubungulisiza loludaba olunezikhalo zawo.
Omunye wabaholi be MKMVA ongathandanga naye ukudalulwa uthe, “Sizothatha isinyathelo esinamandla kakhulu. Sizosebenzisa amaqhinga asetshenziswa yiforamu yamabhizinisi iDelangokubona esebenzisa indluzula uma kukhona okungahambi kahle lokhu kubonakala sengathi ulimi olulodwa kuphela izikhulu eziluqondayo. Siqeqeshwe yi-ANC, asifuni ukuzithola sisebenzisa lezi zindlela ngokumelene nenhlangano yethu. Kwakukhona isivumelwano esasayinwa ngonyaka odlule nomasipala sokugcina amathuba emisebenzi engama-10%, okuyimisebenzi yangaphakathi kumasipala ukuhlomulisa amasosha,” kusho lomholi.
Okhulumela iMeya kuMasipala weTheku uMnu uMthunzi Gumede ukuqinisekisile ukuthi ukhona umhlangano obe khona ngoLwesithathu nobuholi beMKMVA nezinye izinhlaka ngemuva kwesiteleka. “Bekungekho ukuxhumana okukahle phakathi koMkhandlu kanye nazo lezi zinhlaka. Izikhalo zabo bezifaka nokutholakala kwamathuba emisebenzi. Kulomhlangano sibe sesixoxisana ukuthi akube khona ihhovisi elizobhekelela ukuxhumana phakathi kukaMasipala nabo okuyilo elizobe libazisa ngakho konke okwenzekayo. Kumanje ikhona imisebenzi esikhangisiwe.”
Mayelana nomonakalo owenzekile uGumede uthe bebengakawuhlonzi ukuthi ungakanani futhi ungaba izindleko ezingakanani.
Ube esekuqinisekisa ukuthi ukusebenza kuyaqhubeka emkhandlwini futhi akekho umsebenzi abathole ukuthi ubike ngokulimala ngesikhathi sombhikisho bevinjiwa ukuthi bangaphumi.