Amathemba ayewukela ngekusasa le-Afrika
Amazwe ase-Afrika sizowahlomulisa kakhulu lesi sivumelwano siphinde sikhulise nomnotho ngokuphindiwe
KUFANE nokuqopheka komlando ukuhlangana komengameli nabaholi abehlukahlukene bamazwe e-Afrika, ezweni laseRwanda emasontweni amabili edlule lapho bekudingidwa khona ngekusasa le-Afrika.
Kule ngqungquthela amazwe angama-44 kwangama-55 akhele leli zwekazi , njengomyalelo wenhlangano i-African Union (AU), ahlanganile athatha isinqumo esinqala maqondana nokusebenzisana okusenzingeni eliphezulu.
Ngokuhlanganyela abamele amazwe bathe besekela lokhu okubizwa nge-African Continental Free Trade Agreement (AfCFTA). I-AfCFTA lena iyisivumelwano esinqala kakhulu ngoba sihambisana nephupho leAfrika lokusebenzisana ukuvula imingcele, nokuwisa imigoqo ebikade ivimbe ukuthi kungabilula ukusebenzisana kwezomnotho.
Uma konke kuhambe ngendlela ngalesi sinqumo, lokho kuyosho ukuthi ukuthengiselana kwamazwe e-Afrika kuyobalula. Akukho lapho kusayodingeka kakhulu ukuthi ezinye zezimpahla zihanjiswe phesheya ngaphambi kokuba sizithenge njengamaAfrika, njalonjalo.
Okumele masikuqonde ngalesi sinqumo ukuthi, akuwona wonke amazwe aseAfrika asazibandakanye naso okwamanje. Amanye amazwe asemathintanyawo ngaso, njengoba sazi ukuthi emazweni angama-55, kuhlangane kuphela angama-44.
Nakuwo lawa angama-44, amazwe amabili okuyiNingizimu Afrika neNigeria awakazibandakanyi ngokugcwele njengamanye, yize noma iNinginzimu Afrika yona ibikhona futhi ikwazile ukusayina uhlaka lokuzibophezela ukuthi iyaseseka lesi sinqumo.
Ithathe isinqumo sokuthi isazoyobonisana ngaphakathi nezinhlaka zayo okuyizinhlangano ezahlukahlukene kanye nokucwaninga imigomo ezokwenza ukuzibandakanya nalesi sinqumo kuyizuzise. INigeria nayo ibhale incwadi eshoyo ukuthi izoseseka lesi sinqumo, kodwa isabonisana ngaphakathi. Kuzo zonke lezi zinto, iqiniso ukuthi nxa sibheka ukwakheka kwezinhlaka ezifuze ese-AfCFTA emhlabeni jikelele, zakheka emuva kokuthi izwe nezwe selikwazile ukufeza cishe lokhu okulandelayo: uzinzo emnothweni walo, uzinzo lwezepolitiki, uhlelo lwezimali oluphusile, neminye imibandela ehambisana nakho.
Nxa sibheka le mibandela evame ukusetshenziswa, amanye amazwe ase-Afrika awakwafinyeleli kulesi sigaba esingenza kusheshe ukusebenzisana ngalolu hlelo. Okunye okubuye kulethe ungabazane, ukuthi amazwe aziwa njengamakhulu afana neNingizimu Afrika, i-Egypt kunokwesabela ukuthi kungase kube yiwo ahlomula kakhulu njengezikhondlakhondla ezivele zinengqalasisizinda ebanzi kanye nenkence amanye amazwe amancane ngokomnotho angenayo.
Nayo iNigeria inkulu kangaka nje, inokwesaba ukuthi isadinga ukuzithuthukisa kuqala ngokuthi yakhe ingqalasizinda, ikhuphule imikhiqizo yayo futhi yandise amathuba emisebenzi, yehlise nobubha obusayikhungethe.
Konke lokhu ikubona kungase kube yitulo elenziwe ngenhloso yokuthi kunqindeke amathuba okuzithuthukisa emikhakheni eminingi eyehlukene iNingizimu Afrika esivele ifinyelele kuyona. Lolu ngabazane luyafana nolwamanye amazwe nawo akhala esifanayo. Umbuzo okhona ngothi kumele kwenziwe njani?
Okucacayo ukuthi amazwe asevele esesayinile nalawo asazosayina njengeNingizimu Afrika, kuzomele abonisane nezinhlaka zamabhizinisi ezahlukene, imikhakha yezepolitiki, abamele izinhlangano zezisebenzi nabanye, ukuthi nxa sekuqhutshekwa nalesi sinqumo kuya phambili, iminotho yala mazwe ewonkana izothinteka kanjani.
Akuzubabikho yini incindezelo engase yehlele amazwe amancane. Kodwa okucacayo wukuthi, wonke amazwe ase-Afrika, sizowahlomulisa kakhulu lesi sinqumo futhi umnotho wawo kubhekeleke ukuthi ukhule kakhulu usuke kusigidintathu ongu$2.3 ($2.3 trillion) uye kusigidintathu ongu-$6.5 eminyakeni ecishe ibe seshumini ezayo. Nxa sisetshenzwe kahle lesi sinqumo, siyoba ngesikhulukazi emhlabeni jikelele, nalabo abasacindezele i-Afrika ngezindlela eziningi bayoyikhotha imbenge yomile. I-Afrika nezingane zonke zayo impilo yazo iyoguquka ngendlela engakaze ibonakale ngaphambilini.