Bakhumbuza uMengameli izethembiso azenza ngabasemapulazini
ISOUTH African Human Rights Comission (SAHRC) okuyisikhungo esilwela amalungelo abantu isezinhlelweni zokucela uMengameli uCyril Ramaphosa ukugcina isethembiso asenza ngowezi-2014 sokuvimba ukuxoshwa kwabantu emapulazini bengakatholelwa izindlu ezibanika isithunzi.
UKhomishana uChris Nissen wazise abebehambele Indaba ebimayelana nokuxoshwa kwabantu emapulazini ukuthi ngemuva kwesiteleka sabasebenzi basemapulazini eWestern Cape esasaziwa ngeDe Doorns, uRamaphosa ngaleso sikhathi oweyeyiSekela Mengameli wathembisa ukuthi kuzoma nse ukuxhashazwa kwabantu kulezi zindawo. Uqhube wathi uMengameli wathembisa lokhu ngemuva kokuba ebe nomhlangano ophuthumayo nabezolimo nababemele abasebenzi ePaarl, ngoLwezi wezi-2014.
Kule Indaba eNissen abekhuluma kuyo beyihanjelwe ngaboMnyango Wezolimo, izikhulu zikaMasipala iDrakenstein, abeWomen on Farm Projects neziMantshi. “Okubuhlungu akukho nokukodwa osekwenzekile kokwathenjiswa uMengameli. Sesithathe isinqumo sokuya kuye ngqo, siyomcela ukuthi akagcine izethembiso zakhe,” kubeka uNissen.
UGloria Songelwe oyisakhamuzi saseWellington uveze ukuthi abasebenzi abaningi basasaba ukulwela amalungelo abo emapulazini.
ULionel Beerwinkel woMnyango Wentuthuko Yezindawo Zasemakhaya Nokubuyiselwa Komhlaba uveze ukuthi ngaphansi komthetho i-Extension of Security of Tenure Act (ESTA) umhlali wasepulazini akavunyelwe ukuxoshwa uma esehlale kulo iminyaka eli-10 kuya phezulu noma esehlanganise iminyaka yobudala engama-60.
“Nokho uma ipulazi selinomnikazi omusha kumele aqhubeke nokunikeza abahlali igunya lokuhlala. Okubuhlungu ukuthi i-ESTA kayikuvumeli ukuxoshwa kwabantu empulazini,” kubeka uBeerwinkel.
ULauren Waring oyimeneja kaMasipala iDrakenstein uveze ukuthi endaweni kuyinto exhaphakile ukukhishwa ngodli kwabantu emapulazini. “Lo mkhuba uyasikhathaza. Siyazi ukuthi njengamanje ayi-1 1127 amacala okuxoshwa kwabantu emapulazini aqulwayo. Okubuhlungu kasazi ukuthi bangaki abahlukunyezwe yilokhu kodwa kusolwa ukuthi balinganiselwa ezi-2000,” kubeka uWaring.