Abaholi sebesebenzisa amasonto ukugaya amavoti
EMUVA kokuyokhonza nebandla i-United Congregational Church (UCC) lase-Afrika eseningizimu, ngifisa ukuthulela isigqoko uMengameli we-Inkatha Freedom Party (IFP) iNkosi uMangosuthu Buthelezi ngokungaxokizi ngokholo lwakhe olujulileyo kuSomandla.
Namuhla sibona abaholi bezombusazwe sebephendule amabandla indawo yokugaya amavoti nesigcawu sokudatshukelwa kukho konke okubi abakwenzayo ngokuba kwabo semandleni.
Abanye abazi ukuthi uShenge ngenkathi esenguNdunankulu kuHulumeni omdala wakwaZulu, njalo ngonyaka ngaphambi kokuba kuvulwe iSishayamthetho sikaHulumeni wakwaZulu kwakuba nesidlo somkhululeko.
Lapho kwakumenywa abaholi abehlukene bezothandaza bashumayele. Naye uShenge wayeba ngesinye sezikhulumi acele ukuba uSomandla abahole emsebenzini wabo ukuba bahole isizwe ngobuqotho.
Wayengakwenzi lokhu ngoba efuna ukubukwa yizwe. Kuzo zonke izinkulumo zakhe wayehlale ekhumbuza ozakwabo kuKhabhinethi yakhe kanye namalungu eSishayamthetho ukuthi bayizisebenzi zabantu. Komunye umkhuleko waze wabakhumbuza ukuthi igama elithi; minister ngesiLathini lisho ukuthi “isisebenzi.” Wayevame ukuthi kumqoka ukuba bangalikhohlwa lelo qiniso lokuba yizisebenzi zabantu.
Nasezinkulemweni zakhe akakukhohlwa amenyelwe khona nafanele akusho.
Ukhuluma iqiniso njengoba linjalo ngokungagwegwesi. Uyayiqonda inkundla yezombusazwe nokuhlonipheka kwebandla. Akakhulumeli izihlwele njengoba kwenza abanye. Izinkulumo zabo azizikile azinammongo. Izinkulumo zikaShenge azigcwele ukuzinaka nobumina kepha zinentobeko nokubabaza ubukhulu bukaSomandla.
Ngakho siyabonga ukuthi selokhu kwathi nhlo awukaze ubone indlu kaSomandla iyishashalazi lapho ungagaya khona khona amavoti. Shenge! Siyabonga ukuthi awukaze ube usomathuba wezombusazwe.