Lisabalulekile iqhaza likaKaunda eZambia
UMengameli uLungu kubonakala zimbhedela izinto, usengcupheni yokuphunyukwa yisikhundla
UMA kukhulunywa ngeZambia kunzima ukuthi lingasala ngaphandle igama likaMnu uKenneth Kaunda othathwa njengobaba weZambia. Phela nguye owaba nguMengameli wokuqala emuva kokuba izwe lithole inkululeko kumaNgisi aseBritain ngowe-1964. UKaunda owaziwa kakhulu ngelika “KK” nguye noMnu uRobert Mugabe kuphela abasadla anhlamvana kubaholi bakudala be-Afrika ababamba iqhaza elibalulekile ekukhululeni izwekazi kumakoloni. Abanye abaholi ababeyibambe nabo oMnu uJulius Nyerere waseTanzania, uDkt uNelson Mandela, uMnu uSamora Machel, uMnu u-Antonio Agostinho Neto owayebusa e-Angola, kuze kuyoshaya kuMnu uNkwame Nkrumah waseGhana.
Sebebaningi omengameli ababusile eZambia emuva kokuphuma kukaKaunda ngowe-1991. Phakathi kwabo kubalwa uFrederick Chiluba, uLevy Mwanawasa, uRubiah Banda, uMichael Sata owazunywa ukufa esesikhundleni indawo yakhe yathathwa uMengameli u-Edgar Lungu. Lelizwe elicebe ngecopper, kubonakala seliqala ukudunguzela ngaphansi kobuholi bukaLungu.
Kubona bonke abaholi asebephathe ngaphansi kombuso wentando yabantu, uLungu kubonakala ethwele kanzima ngaphakathi eqenjini lakhe nangaphandle emaqenjini aphikisayo. Ngeledlule iqembu elikhulu eliphikisayo i-United Party for National Development (UPND) eliholwa uMnu uHakainde Hichilema lizame ukumkhipha ngevoti lokungamethembi esikhundleni uLungu ngezinsolo zokwephula isethembiso sokuhlonipha umthethosisekelo wezwe ngokhetho lwangowezi-2016 lapho iqembu eliphikisayo likholwa ukuthi yilo eladla umhlanganiso kodwa lanyundelwa. Izinkinga ezihambisana nobuthaka bukaLungu ziqale ukugqama ngesikhathi kukhishwa imiphumela yokhetho lapho athola khona amavoti angamaphensenti angama-50.35, imbangi yakhe uHichilema yathola angama- 47.63. Kusukela aputshuka ngembobo yenaliti okhethweni, linyukile izinga lokungabethembi ubuholi bakhe. Kungenzeka angaliqedi nehlandla lakhe lokuqala noma akhale ngaphansi okhethweni lobuMengameli oluzoba ngonyaka wezi-2021.
UKaunda usethathwa njengedlozi e-Afrika ngoba sekucelwa izeluleko kuye uma kunezingqinamba ezikhungethe amazwe. Nguye lo mholi okudingeke ukuba angenelele axoxisane nobenguMengameli eZimbabwe uMnu uMugabe ukuze agcine ehlile esikhundleni. Uma ingcindezi ikhula ekutheni uLungu ashenxe esikhundleni kungathokozisa ukungenelela kukaKaunda anike izeluleko ukuze kugwenywe ukushabalala kwesithuzi sezwe elihlonishwa njengeZambia futhi elinomlando wokusiza amanye amazwe angomakhelwane ngesikhathi esinzima sobandlululo namakoloni. Akukho okutheni okubikwa ngeZambia kwabezindaba nakuba ekhona amanenjana enkohlakalo avelayo kodwa okuhle okwenzeka khona njengomthethosisekelo wakhona ovumela ukuba umengameli aphathe amahlandla amahlandla amabili akugxilwa kakhulu kukho. Inqubo yaseZambia yokuvumela ukukhankasa ngokuvulelekile kwawo wonke amaqembu ezepolitiki ithakaselwa kakhulu ngamazwe omhlaba.
Zikhona iziqubu ezike zanzima nalapho uMengameli wesibili waseZambia uChiluba waguqula umthethosisekelo ukuze avimbele uKaunda ukuba angambangisi esikhundleni ngoba ethi uKaunda akayena owokuzalwa eZambia. Kwacaca ukuthi wayezesabela uKaunda nje, ngoba wayephathe iZambia isikhathi eside futhi ehlonishwa. UChiluba wazama nokuthi aphathe ihlandla lesithathu kodwa izinto zamphika wagcina eseboshwa ngamacala enkohlakalo awavulelwa owangena emuva kwakhe uMengameli Mwanawasa. Ngokusho kohlaka oluhlonishwayo kulelizwe iConference of Catholic Bishops, iZambia isiphelelwe isithunzi sokuthi isengabizwa ngezwe eliphethwe ngokwentando yabantu. Lolu hlaka luthi ngaphansi kobuholi bukaMengameli uLungu neqembu lakhe iPatriotic Front izwe seliphendulwe ihlathi labaholi abangondlovukayiphikiswa.
OBhishobhi abahola lolu hlaka phambilini bebezwelana kakhulu neqembu elibusayo ngesikhathi sikaMengameli uMichael Sata ngowezi-2011. Umbuzo abazibuza wona abantu baseZambia ukuthi sekonakelephi ekutheni abaBhishobhi beseke uLungu. Kuningi abakuvezile abakhala ngakho phakathi kwakho abathi indlela okuphethwe ngayo umholi weqembu eliphikisayo uHichilema. Baveza ukuthi ukuboshwa kwakhe nokuthweswa amacala okuvukela umbuso akubanga semthethweni. Bathi ukuboshwa kwakhe bakubona njengokujeziswa ngoba engahambisani noMengameli uLungu. UHichilema ukholwa ukuthi nguye owanqoba ukhetho lwangowezi-2016. Abanye ababesemzabalazweni emazweni angaphansi kweSouthern African Development Community (SADC), babona uHichilema njengomdayisi. Okuqinise lokho wukuhambela kwakhe eNingizimu Afrika emenywe iqembu eliphikisayo iDemocratic Alliance (DA) lapho wayezocobelela ulwazi ngenqubo yalo. AbaBhishobhi bami kwelokuthi uLungu wehlulekile ukuhlonipha umthethosisekelo ngoba nguye ophinde waba nesandla ekutheni Inkantolo Yomthethosisekelo ingalulaleli uhlangothi oluphikisayo. Usolwa nangokuthi usethathe umbutho wamaphoyisa wawufaka kwezepolitiki ukuze akwazi ukuwusebenzisa ezimpini azilwa naphikisana nabo. UMengameli wagcina emkhululile iHichilema kodwa kuyacaca ukuthi labo abamfuna ephumile esikhundleni abakuzwa nhlobo lokho.
Amaqembu aphikisayo kumele ayivume induku uma ehluliwe okhethweni. Kumele ahlele kabusha amaqhinga okubuya ukuze anqobe kunokuba asebenzise izindlela ezinqamulelayo. UHichilema nabamesekayo babonakala besebenzisa amaqhinga eDA kuleli ebingaphumuli ngesikhathi sikaMengameli uZuma ifaka ePhalamende ivoti lokungamethembi ngoba ifuna ukungena emandleni ngezindlela ezisheshayo.