Kusenezithiyo ezidinga ukususwa phakathi kwama-Afrika
ESIKHATHINI esiningi kujwayelekile ukuthi aboHlanga abangabokuzalwa eNingizimu Afrika bagubuzelwe umqondo wokuthi leli lizwe aliyona ingxenye yezwekazi i-Afrika.
Kusadingeka ukuba sike siqinise amaxhama okuxhumana, sazane kangcono singama-Afrika kunakuqala, singahlali salinda emathonsi abanzi.
Ngeshwa elikhulu akukenzeki ngenxa yokuthi azikho izinhlelo eziphume uqekelele komathelevishini ziqhakambisa aboHlanga base-Afrika.
Ingoba sisesaba abelungu nokunye okuyizithiyo emizamweni yokwakha ubunye be-Afrika yasemandulo, ingakaqhwagwa umbuso namandla ayo ngubukoloni, ubuntshonalanga kanye nobandlululo.
Yebo, bakhona abazamayo ukuhlanganisa aboHlangabaseAfrika, njengothisha wasePhefeni High School, eSoweto, ongumsakazi weSAFM uRichard Nwamba ongowokudabuka eMozambique. UMwamba ukwenza lokhu ngokuhlaziya kanye nokudlala umculo waseAfrika ohlelweni alushayela olubizwa ngokuthi, The African Connection. Lolu hlelo lukaMwamba lungena njalo ngoMgqibelo kusukela ngehora lokuqala kuya kwelesithathu.
Ukwanda kwaliwa ngumthakathi mnewethu uMwamba, ngiyabonga akubusise uMvelingqangi (Irmao, muito o’ brigado, empraseri, Todo poderoso).
Kwakungowe-2002 mhlazane esakaza bukhoma lolu hlelo enxanxatheleni yezitolo iGateway Shopping Mall eMhlanga nokuyilapho angikhuthaza khona ukuba ngiqhubeke nokuyithunga ibhenge nentshengula ngokuntongelisas isizwe neAfrika umlando wezindawo okuhlala kuzo aboHlanga njengezasemakhaya, emalokishi, emadolobheni nasemahositela imbala.
KuseNquthu lapho sesikhona, lapho sibona inhlakanipho kaMvelinqangi eyenza iNkosiyesizwe sakwaMolefe kanye neNkosi yisizwe sakwaMpungose ukuba abuse ngobuhlakani ezindaweni zawo.
Akekho ongazi ukuthi iNquthu idume ngentaba iSandlwana, enomlando omkhulu nobalulekile hhayi wamaZulu wodwa ngisho nezinye izizwe, nangokuheha izivakashi.
Kukuyo le ntaba lapho amabutho eNgonyama uCetshwayo anqoba impi yamaNgisi udede, emini bebade mhlazi ngama-22 kuMasingana ngowe-1879.
Sithola ukuthi iMafitleng yakhelwe isizwe sabeSotho, kube nesigodlo seNkosi u-Elphas Molefe, nesikole esaqanjwa ngayo lendawo.
KuseNquthu lapho ungakwazi ukufunda nokubhala ulimi lwesiSotho kanye nolwesiZulu uma uphokophele ukuzazi izilimi.
Kwaze kwaqinisekiswa nguMnu uBonginkosi Vincent Ndlovu waseMbumbulu, eMangabazini, abathi uMagaye nowayefunda eMponde kwesabeSotho nokuyigama lentaba, esikoleni iMaduladula, ukuthi usuke uziyekele wena ukuba wazi ulimi lwesiSotho kanye nolwesiZulu.
Inselelo lena esibhekene nayo njengoba singashabasheki ngokwanele ngolimi lwethu lwethunga. Angisayiphathi eyokuba nodlebe uma bekhuluma isiSotho nezinye izilimi ukuthi bathini. Kusadingeka ngempela ukuba kugxiliswe lokhu ezweni lonke.
Uma sikhothoza kancane uzobathola bekhuluma kancane isiSotho abasesigodini saseNgudulwane, iNdindindi kwesikamsakazi woKhozi FM uSbu Buthelezi.
Uma ususeNquthu ukhangwa enye futhi intaba enhle uMkhonyane ecijile nje, okwaqanjwa isigodi eMkhonyane kanye namaHhovisi aseNquthu futhi.
Singalibali ukuthi njalo ngenyanga uNdasa eNquthu nakwezinye izindawo abeSotho bagubha umrero, usuku lokuzalwa kukaKgosi uMoshoeshoe.
Umgidi wabeSotho lona owawubona ngisho neNkosi u-Elphas Molefe isadla anhlamvana ingena phakathi igide nabesilisa ingoma yakobeSotho kube kuhle kube njeya.
Ngakho ke akumangazi uma usubona kubungazwa lolu suku nayizigodi zakweseNkosi uMpungose okungesaseThelezeni, eHaladu, eNkande, eNgudulwane, eZiqhazeni, eBaqulusini kanye nezinye.
Khona ube futhi usuthola iSt, Augustine’s (Emasosheni). kuye emfuleni uMzinyathi. Baphinde bagabe futhi ngomfula omuhle iBatshe.
Kanti nesitolo somlungu uJohnson sihlinzeka umphakathi futhi kuthenga kuso zonke izigodi zamaKhosi aseNquthu.
Sekuwumlando ukuthi kwake kwaba neziga kanye nenkwishinkwishi kwashuba umoya eNquthu kwakubi ngeminyaka yowe-1990 yodlame lwepolitiki aboHlanga beqedana bodwa.
Lwabuye lwabhebhethekiswa kakhulu ngamaBhunu nimbutho wezokuvikela iSouth African Defence Force buthule nomashayabhuqe, ababebulala isinyelela.
Kanti futhi singeze sakhohlwa ukuthi sekwaba ngumlando ukuthi iNkosi u-Elphas Molefe ingakakhothami, yake yazithola seyishangasa,isingumtshingo ubethwa ngubani, seyibhace kwamanye amafulethi aseThekwini.
AboHlanga base bethathelene izikhali, sebeyinkukhu nempaka. Nokho ngokuhamba kwesikhathi kwabuya ukuthula, ubunye nobumbano lwasemandulo lwaboHlanga.
Yingakho olwaseSandlwana nolukaMoshoeshoe lugujwa ngokuthula, ngoxolo nangentuthuko eNquthu.