Ukuhlukumeza ngokocansi kuyaxoshisa emsebenzini
SESIYAZI ukuthi ukuhlukumeza ngokocansi akuvumelekile emsebenzini. Kuwubandlululo olungenabulungiswa. UMthethosisekelo noMthetho Wezobulungiswa Emsebenzini uyakucacisa lokho. Izenzo zokuhlukumeza ngokocansi zicaciswe Wuhla Lokuziphatha Kahle Ukuqapha Ukuhlukumeza Ngokocansi Emsebenzini olwashicilelwa ngoNtulikazi we1998 nangoNcwaba wezi-2005.
Baningi abephula lo Mthetho ngenxa yokungazi ukuthi sebeyizelelesi. Kanti baningi futhi abangabagilwa zalezi zenzo zokuhlukumeza ngokocansi bengaboni noma bengazi ukuthi bayagilwa nokuthi zinyathelo zini okumele bezithathe ukunqanda ukuhlukunyezwa ngokocansi. Siphawula ngalolu daba nje sihlaziya isinqumo seNkantoo Yezabasebenzi sangomhla zingama-27 kuNhlolanja kophezulu ecaleni leRustenburg Platinum Mines Ltd unombolo JR 641/2016, lapho iphikisa isinqumo seCCMA esasivuna uPietersen owayexoshelwe ukuhlukumeza owesifazane uKgole.
Ukuze ubone ukuthi okwenzalakayo kuwukuhlukumeza ngokocansi kufanele ubheke ukuthi ingabe kuyisenzo esingemukelekile esincike kwezocansi esephula ilungelo lomqashwa futhi sibe yisithiyo (yisiphazamiso) emsebenzini esenzeka ngezizathu ezinqatshelwe okungezocansi, ubulili noma ukuziphatha kwezocansi. Bheka futhi ukuthi kuyisenzo esingemukelekile kulowo oyisisulu, kuyisenzo esenzeka njalo futhi sinomthelela wokwehlisa isithunzi nobuntu sinomthelela futhi nasekuziphatheni kohlukumezekile ezintweni ezithinta ucansi.
Izenzo zokuhlukumeza ngokocansi zixuba izinto ezilandelayo: kungaba ukudlwengula, ukuthinta noma ukupotoza, ukushaya, ukukhumula noma ukunqunula (ukudunusela), ukubelesela weshela, ukuthumela izithombe noma ngahlobo luni inkulumo egigiyela ucansi, Ukukhuzela noma ukushaya ikhwelo uncoma noma ukhanuke isimo somzimba okuncike kwezocansi.
Ukwenza izethembiso zamalungelo athile noma zokwephucwa kwalawo malungelo uma kuzoshiyelwana ucansi noma uma umgilwa enqaba ukushiyelana ucansi nomhlukumezi.
Izibonelo ezivamile zalokhu ukuthi osesikhundleni sokuphatha asebenzise isikhundla ukuvuna noma ukuhlinzela phansi umgilwa mayelana nokuqashwa, ukukhushulelwa esikhundleni, noqeqesho lomsebenzi, ukuqondisa ubugwegwe, ukuxoshwa nasekukhuphuleni umholo nemihlomulo. Noma ngabe isenzo salokhu kuhlukumeza sisodwa, naso siba yicala eliwubandlululo olungenabulungiswa.
Ziningi izindlela atshengisa ngazo umgilwa ukuthi isenzo akasithandi asemukelekile kuye. Lezi zindlela zixuba ukuthi umgilwa angakhulumi, avele aqheluke noma angaphenduli esenzweni leso somhlukumezi. Ukuthi umgilwa wake wavuma ngaphambilini akusho ukuthi useyoqhubeka nokwemukela isenzo leso sokuhlukunyezwa.
Kwesinye isikhathi lapho umgilwa engenandlela yokutshengisa umhlukumezi ukuthi akakuthandi okwenziwayo, uye acele usizo lokungenelela komunye uzakwabo, umphathi omunye kunomhlukumezi, isisebenzi soMnyango Wezabasebenzi, umngani noma ilunga lomndeni wakhe.
Okwakwenzekile kuleli cala ukuthi umhlukumezi wayesesikhundleni sokuphatha esikhulu kunaleso sowahlukunyezwa. Esikhathini esiyiminyaka eyisi-8 umhlukumezi wayelokhu eshela ngezindlela ezahlukene, efuna ucansi kumgilwa. Ezinye zelezi zenzo ukubeka umgilwa icala lokungalaleli okwathi ngalolo suku lwecala kwaba nezoso. Umhlukumezi wasebenzisa lona lelo thuba ethembisa umgilwa imali uma evuma ukulala naye. Izikhathi eziningi lapho umhlukumezi ayecela, eshela umgilwa owayengavumi.
Okunye akwenza umhlukumezi ukuhlela uhambo lokuyoqeqeshwa oluqondanisa yena nomgilwa, nokwethembisa isikhundla esithe xaxa uma evuma ukulala naye. Izinsuku okwenzeka ngazo konke lokhu, umgilwa wayengasazikhumbuli. Futhi esaba nokulubika udaba okwaze kwathi eselokhu ekhishwa inyumbazane lwangenwa ngumkhwenyana wakhe. Umhlukumezi waxoshwa, kodwa wafaka icala kwaCCMA. UKhomishana wamvuna wanquma ukuba abuyiselwe futhi akhokhelwe imiholo yesikhathi ayesesihlalile. Umqashi waledlulisela eNkantolo Yezabasebenzi, okwabe sekukhishwa isinqumo esikhuluma ngaso lapha. INkantolo yasiguqula yavuna umqashi ukuthi bekufanele axoshwe umhlukumezi.
ESigabeni 60 uMthetho Wezobulungiswa Emsebenzini uNombolo 55 we-1998 uthi izenzo zokuhlukunyezwa ezenziwe emsebenzini mazibikelwe umqashi ngokushesha, nomqashi makathathe izinyathelo ezisheshayo ukungenelela, alusebenze udaba njengoba kulawula uHla Lokuziphatha Kahle. Kodwa kuleli cala umahluleli uthe kemele kwamukelwe ukuthi ziningi izizathu ezibangela ukuba umgilwa engakubiki masinyane ukuhlukunyezwa kwakhe. NgokweNkantolo lezi zizathu zixuba lezi: Ukushaqeka, ukungakholwa ngokukwehlelayo; ukwesabela ukukhishwa inyumbazane nokunyundelwa emsebenzini; ukwesaba ukudala ukungezwani nomsindo emsebenzini ikakhuu lapho kungetholakale bufakazi ngoba abanye besaba noma beyizincelebana zakhe umhlukumezi; ukubekezela ucabange ukuthi kuzokwendlula ukuhlukunyezwa; ukuzwela yena umhlukumezi noma umndeni wakhe nokwesaba nje ukuzifaka ezinkulumweni.
Ngalezi zizathu iNkantolo ithe ukuthula komgilwa kwakungasho ukuvuma. Yathi isikhathi eside naso futhi kasisho ukuthi umgilwa uqamba amanga. Kanjalo nokungakhumbuli izinsuku okwakwenzeka ngazo izenzo zokuhlukunyezwa nakho iNkantolo ithe kakuchithi ubufakazi bomgilwa ngoba wayenofakazi, ibe umhlukumezi yena engenabo ofakazi futhi ekuvuma okwenzeka kokunye echaza ukuthi wazeshelela engaqonde kuhlukumeza. Okubalulekile futhi ngokwashiwo yiNkantolo ukuthi akunasidingo sokuba umgilwa aveze ubufakazi bokuthi wayemtshela umhlukumezi ukuthi akasithandi isenzo somhlukumezi.
Ngalezi zizathu iNkantolo ithe ukuthula komgilwa kwakungasho ukuvuma