Amasonto angabamba iqhaza ekuvuselelweni kolimi
SETHEMBA nisigubhe ngokuzinakekela isikhumbuzo,sendodana yentombi yaseMagdala. Njengoba siphuma ePhasikeni kuningana engingakubalula mayelana nokuvuselelwa kwezigameko zasendulo. Izimoto bezishaye ujenga ezinkalweni zalo lonke leli. Hhayi ngoba kunocwaningo olusha ngokubethelwa kukaJesu. Obekuyodingidwa yikho ukuvuselelwa komlayezo oyisimbelambela ongaguquki. Umlayezo wesigameko esehla endaweni ebizwa ngeCalvaira lapho insizwa eyayizalwa wumbazi uYeshua Ben Yosef inethwa zinduku kubuka umhlaba ngenxa yezimfundiso nezintshumayelo ngoMbuso wezulu. Lokhu kushuthekwa mihla ezingqondweni zabantu ezinkonzweni ngamasonto, umthombo munye yincwadi enomlomo obomvu equkethe umlando nemvelaphi ngenkolo yamaJuda kusukela kuseyi Judaism eyafika noMose kuze kufike kulena ebizwa ngobuKhrestu eyagcina isikapakela nakwezinye izizwe ngenxa yomlayezo omuhle ovela kuJesu.
Minyaka yonke izibalo ziyakhula sibona izinkumbi zamahlelo ahlukene angoma ngomanye elugubha ngentshisekelo lolu suku. Ngisho nalabo abangakaze balunguza noma balubhada kwa-Israel ubezwa bememeza uNkulunkulu ophilayo uJehova kaDavide kaJakobe lapha kusuke kubalwa okhokho ngokulandelana ngokwezigameko uma kuthandazwa.
Nakhu okumangalisayo uma kuza ezintweni eziseduze futhi ezisithintayo siyisizwe sizibona njengezinto ezisemuva. Lapha ngikhuluma ngemicimbi yesizwe evuselela indabuko yomuntu. Asiziboni lezi zinkumbi, lokhu kusho ukuthi kuningi esingakufunda ebandleni likaKhrestu ekuvuseleleni isikompilo lethu. Ngoba lapha kusuke kungekho okusha abakhuluma ngakho, manje sehlulwa yini ukunakekela imilando emihle nebuhlungu yezwe lethu. Uma ubheka imibhalo yeBhayibheli yaqoshwa ezibhebheni zamatshe endulo yagcinwa kuze kube yinamhlanje, kodwa thina asazi ngisho amahubo emindeni yethu. Imibhalo yeBhayibheli siyimemeza sicimezile. Kungani singafundi ekukholweni imbaluleko yokunakekelwa kwemvelaphi?
Into okumele siyiqonde futhi siyemukele wukuthi isihlahla asehlukani nezimpande zaso. Ngeke kukhulunywe ngoJesu engaphathwa uyise nonina, yingakho aziwa njengendodana yombazi aphinde abizwe ngendodana kaDavide ngoba kusuke sekukhulunywa ngolibo lwakhe. Ngenza isibonelo ngenkolo yobuKhrestu ngoba inkulu emhlabeni futhi ayigxilanga nje kuphela kwezomoya kodwa iyakuveza ukubaluleka kokugcinwa kwamagugu nomlando. Yingakho-ke nencwadi ebizwa ngeZikronike esho uChronicles okuchaza ukuqoshwa nokugcinwa komlando. Sengathi abaholi bamabandla bangalwenza ucwaningo olunzulu ukuze sinciphe isizukulwane esibukela phansi imvelaphi yaso ngenxa yokusonta. Kusobala ukuthi uma kungase kubanjiswane kungakheka umphakathi ohlukile ngoba ekugcineni sinabo abasizalayo futhi ukhona owasidala njengoba sibizwa ngezidalwa nje. Amasonto angabamba iqhaza elikhulu kabi ekuvuselelweni kolimi njengoba ekhona amabhukwana aqukethe amagama okuhlabelela. Lezo zingoma zaqanjwa ngababhali abanohlonze abefana nobaba uKJJ owabhala izingoma ezaziwa umhlaba wonke njengalena ethi Igama Lenkosi Liyiyo Inqaba nethi Yeka Ubuhle Bokumazi Ebusheni.
La magama okuhlabelela aqanjwe ngolimi lwebele futhi avusa usinga nomoya wendumiso ngakho-ke emibhidlangweni yokuvuselela amahubo ethu asendulo singanqoba uma singasebenzisa lo mdlandla esiba nawo uma siya ePhasikeni. Impela ziningi izifundo ezingahlomula kuzo uma singaqaphelisisa indlela abazinikela ngayo abakholwayo kunokuthi sibagxeke. Kunzima ukuba nesiko elimi ndawonye uma umongo walo uhlala ubhekana nezinguquko ngokwezigameko zokuphila. Inkolo ingenye yezinto ezishaqe kakhulu thina boHlanga. Singebheke ububi obenziwa yilabo abafika nayo kuphela kodwa kubalulekile ukucosha lokho okungasenza sizothe sikhuzeke singabantu sibe yisizwe esingcono. Ifu nefu lihamba namathonsi alo, okubalulekile wukukhongozela ngokucophelela igula lendlebe aligcwali. Umuntu ufunda aze afe. Umanka usekutheni kukho konke esivulela izingqondo zethu kukho size singakudedeli okwethu. Mina beNkosi mukelani nansi imbozisamahlanga. Impilo mayibe yinala. Makwande!