Intshisekelo negalelo lentsha edala amathuba omnotho
LIKHULU kakhulu igalelo lalabo bantu abasha abanogqozi nentshisekelo yokuqala izinto ezintsha eziholela ekwakhiweni kwamathuba amasha. Inselelo enkulu ukuthi iningi lentsha liyazenyeza licabange ukuthi lokhu elikuphethe akukho ezingeni elifanelekile. Phambilini sike saphawula kule ngosi ukuthi umnotho wesikhathi samanje udinga abantu abakha amathuba kunalabo abalindele ukukhangeza. Kubukeka kuwumqansa omkhulu ukuletha uguquko noma ukusungula into entsha uma usakucabanga, kepha imfihlo isekuzameni. Kungcono ukuzama uhluleke kunokusonga izandla ube umvakwezinye; isukamuva likholwa izagila.
Ubaba uNelson Rolihlahla Mandela owayenguMengameli wokuqala ngaphansi kwenkululeko eNingizimu Afrika wake wathi “Konke kubukeka kunzima futhi sengathi angeke kwenzeke kuze kube khona okwenzayo.” Akumele abantu abasha bavumele isimo sokufela ngaphakathi namaphupho abo kuze kufike omunye umuntu ozokwenza into efana ncamashi naleyo obuyicabanga; kepha wadliwa itwetwe bese usala uncela izithupha. Ngisho noma ontanga yakho sebekutshela ukuthi ngeke uphumelele kusemqoka ukuzethemba ukuze lokho okucabangayo kugcine kufezekile. Iningi lamabhizinisi amakhulu kanye nemikhiqizo eyaziwayo esiyibonayo namhlanje yaqale yachithwa ngabaningi ngaphambi kokuphumelela. Into emqoko uma usungula ibhizinisi elisha noma umkhiqizo omusha ukuqoqa ulwazi olwanele ngesifiso noma umbono wakho bese futhi uyakuqonda ukuthi lokhu ofisa ukukusungula kuzozishintsha kanjani izimpilo zabantu kanye nempilo yakho uqobo.
Iningi lentsha esike yaba negalelo yadala amathuba amasha eNingizimi Afrika ayiqalanga ngezizumbulu zemali kepha yaqala ngogqozi kanye nolwazi. Umbono wakho kanye nokuphokophela kwakho kungaguqula izimpilo zabantu abaningi. Omunye wabangani bami ongusomabhizinisi owaziwayo cishe umhlaba wonke manje uMnu uLufefe Nomjana wodumo lweSpinach King; wasungula inkampani yakhe ngokusebenzisana nomama abalima isipinashi elokishini laseKhayelitsha eKapa. Isifiso sikaLufefe kwabe kuwukuletha into ezoxosha indlala emphakathini wangakubo okhungethwe izinselelo ezahlukene. Namuhla ibhizinisi lakhe laziwa njengeminye yemibono evelele umhlaba wonke emkhakheni wokuqinisekisa ukuthi wonke umuntu ophilayo uyakwazi ukuxosha ikati eziko. Uhlobo lwezinkwa azibhakayo ezifaka izithako zesipinashi zenza ukuthi abantu abampofu bathole ukudla okunomsoco ngentengo ephansi. UNomjana ungabanye babantu abasha esingaphawula ngabo asebebe negalelo eliqavile ekudaleni amathuba amasha omnotho emphakathini. Okuphawulekayo ukuthi iningi labantu abasha abanegalelo elifana nelakhe abaqhamuki emphakathini osemazingeni aphezulu, baqhamuka ezindaweni ezingamalokishi; ezindaweni zasemakhaya ngisho emijondolo imbala. Lokho kuveza ngokusobala ukuthi wonke umuntu omusha onombono angaba negalelo eliqavile ekudaleni amathuba omsebenzi nokukhulisa umnotho.
Esinye sezihlava esidala ukuthi abantu abasha bahudule izinyawo ukuzitshela ukuthi izimpendulo zezinkinga zemiphakathi yabo zizoza noHulumeni noma izimboni ezinkulu ezizimele. Yebo; kuwumsebenzi kaHulumeni ukuqinisekisa ukuthi bonke abantu banengqalasizinda kanye nezinsiza kusebenza ezidingekayo. Nezimboni ezizimele kumele zitshale emphakathini ezisebenza kuyo kepha kuyinselelo yabantu abasha ukuza nemibono emisha. UHulumeni nezimboni ezizimele kumele balekelele lokho okusungulwa yilabo abanemibono kanye nesifiso sokuphonsa esivivaneni sokwakhiwa kwezwe ikakhulukazi ukuthuthukiswa komnotho. Eminye imibono idinga ucwaningo olunzulu kuneminye; yingakho kukhona izinhlelo zokugqugquzela amasu okusungula izinto ezintsha ezilekelelwa uHulumeni kanye nezinkapami ezizimele. Abantu abasha bayakwazi ukuhlola imibono abanayo ikakhulukazi kwezobuchwepheshe ngaphambi kokuthi leyomibono iphumele emakethe. Imikhandlu eyehlukene kanye nezifundazwe ezehlukene kwesinye isikhathi ziba nemincintiswano lapho intsha ingahlongoza khona imibono yayo emisha. Okusemqoka ukuthi umuntu omusha onombono noma isu elisha aphumele obala.
Okuphawulekayo ukuthi iningi labantu abasha abanegalelo elifana nelakhe abaqhamuki emphakathini osemazingeni aphezulu