Uyashabasheka ekuhayeni izinkondlo uNomashenge
ENGAKASHO lutho kodwa uzifundela wena ohlamvini ngalunye alukhipha ngomlomo uNomashenge Dlamini oyimbongi engaconsi phansi kulezi zinsuku ukuthi ungumuntu onesibindi nongazisabi izinselelo.
Esikhundleni sokuthi le ndoni yamanzi edabuka eMnambithi ivune izithelo zeziqu zayo zeBachelor of Phamarcy nezeHonours kodwa iqome ukulandela ubizo lokuba ngusonkondlo.
Kungakapheli sikhathi esingakanani ingene kulo mkhakha ithi ifunga iyagomela ukuthi izowuthatha iwubeke kwelinye izinga ukuze osonkondlo bezokwazi ukubeka isinkwa etafuleni.
UNomashenge oneminyaka yobudala engama-25 uthi ukholelwa ekutheni kumele kube khona okwenziwayo ukuze sande isibalo sabalandeli nabafuna ukungena kulo mkhakha.
Kusaphele unyaka efikile eGoli usenze osekuhlule iningi losonkondlo okungukuhaya izinkondlo bukhoma.
Lokhu kuhaya izinkondlo bukhoma ukubiza ngeHarmonios Dichotomous. Kuzoqala ngehora lesithathu ntambama, e-African Flavour Books, eBraamfontein, eGoli. Kuqondiswe nguSiqwayi Khumalo.
Echaza ngalesi sihloko uthe ngokwalezi zinkondlo igama elithi Harmonios lisho umuntu onokuthula empilweni yakhe, onezinhlanhla, onokukhanya, onothando, ohanjelwa kahle izinto zakhe. Ngakolunye uhlangothi elithi Dichotomous lisho inhlakanhlaka, ubumnyama, izifo, umzwangedwa nokunye okuningi okubi.
“Engiqonde ukukuveza lapha ukuthi noma kungaba mnyama kanjani empilweni yakho kodwa ukukhanya kuyohlale kukhona. Ngifuna abantu baphume benethemba le mpilo. Empeleni lapha ngibhale ngezinto ezenzeke empilweni yami. NgeSonto izinkondlo zizobe zihambisana nomculo omnandi ophelezelwa ulozolo lwezintambo zesigingci,” kubeka le ntokazi eqale ukubhala izinkondlo ngowezi-2005.
UNomashenge uveze ukuthi uma kusukwa eGoli amabombo abheka eThekwini ngaphambi kokuthi ngoMandulo kuyiwe eCape Town.
Le ntokazi eyaphekwa eKeen Artist Theatre (KAT) iveze nokuthi kuwo lo nyaka ihlela ukuqopha iDVD necwecwe okuzoba nemisebenzi yayo emidala nemisha.
Iqhube yathi inhlosongqangi yayo wukugxisha uthando lwezinkondlo kubantu bakuleli. UNomashenge uthe lokhu ukholelwa ekutheni kungenzeka uma kunganda ukudlalwa bukhoma kwezinkondlo okunongwe ngomculo. Uthi iqiniso ukuthi okwamanje abantu babukeka besemadolo nzima ukuhambela ukuhaywa kwezinkondlo.
“Eminyakeni edlule umkhakha wamahlaya bewungahlonishwa futhi ungenzi mali. Konke lokho kushintshile, osomahlaya sebenza imali yangempela. Ukuze nathi sikhule lapha ekuhayweni kwenkondlo sidinga ukusekana sisodwa, uxhaso lwabezindaba. Nathi sibe nezinhlelo ezinjengolwaluthi So You Think You Are Funny okwakungolwamahlaya. Okokugcina kumele umsebenzi wethu siwuhloniphe. Masigqoke ngokufanelekile, sihlanzeke, kungathi uma siqashiwe sifike sekudlule isikhathi, kuqhuba uNomashenge.
Phakathi kwemicimbi emikhulu aseke waqashwa kuyo yiArts International Festival, eGoli, iku-Essence International Festival nakuWorld Leisure Congress, eThekwini iku-Open Book Festival, eCape Town, ikuVavasati International Women’s Festival, ePretoria.
Eminye yiPoet In A Suit, iDurban Wine, iJazz nePoetry Festival eThekwini.
EGoli yiCurrent State of Poetry’s Sho’ Case, ikuLingua Franca Poetry Festival, eCape Town, ikuMadadeni Arts Experience eNewcastle, ikuPACSA Film and Arts Festival, eMgungundlovu, iku-Annual Mayoral Show, eMnambithi nakuParys Youth Month Celebration eFree State.
Ngowezi-2012 ufakwe emunxeni weBest Female Poetry Performer emcimbini iThe Original Meterial Awards.
Imisebenzi kaNomashenge seyike yashicilelwa ku-2007 Poetry Institute of Africa Anthology. Useke waba yijaji ezinhlolokhonweni zezimbongi eziningi okukhona kuzo iNaked World Slam, eCape Town, iVaal River Carnival Slam, eGauteng nakuKZN Provincila Slam, eThekwini.
Ngowezi-2015 uqokwe njengengqwele yePlayhouse Poetry Sundowners Slam kwase kwathi ngowezi-2015 wamela iKwaZulu-Natal kuWord ‘n Sound Slam for your Life National Slam.
Ngonyaka ofanayo esebenzisana noThuli Zuma baqondise umdlalo i-Aiden’s Rose eyahloniswa kuKZN Poetry Theatre Festival, ePlayhouse Company. NgoLwezi wanyakenye uqokwe yiNaana Le Moya, eGoli njengombhali wezindaba ezimfushane. Ezimbongini ezidumile asebenze nazo kukhona isilomo uKhumbulani “Jobe” Sithole, uXolile Vilakazi, uPage, uMxolisi Mtshali, uMinenhle Mthembu ukusho ezimbalwa.
Ichaza le ntokazi ngegama layo ithe, yalethiwa ngiyise uDlamini. Kwakungelikababekazi kayise owayehlobene nabakwaButhelezi.