Ukukhula kwemingenelo yamaSAMA kukhombisa isasasa kubaculi
SINYUKILE isibalo semingenelo yeminxa yamaSouth African Music Awards (SAMA) azoba ngoNhlaba osukwini nasendaweni okungakadalulwa.
UNhlanhla Sibisi oyiChief Executive Officer (CEO) kwaRecording Industry of South Africa (RiSA) okuyinkampani eyamukela imingenelo udalule ukuthi kulo nyaka imingenelo abayitholile ikhule yafinyelela kuma-778.
Kungezeke ngengama-38 uma kuqhathaniswa neyangonyaka odlule okwangena angama-740.
Ngowezi-2016 yayingama-470 nje kuphela.
Ukufakwa kwemingenelo bekuvulwe mhla lulunye kuLwezi wangonyaka odlule kwaze kwavalwa mhla zingama-31 kuMasingana walo nyaka.
Imingenelo ebehanjiswa kwaRiSA ngeyemisebenzi yamaciko enjengezingoma amacwecwe, amavidiyo ekhishwe phakathi komhla lulunye kuNhlolanja wanyakenye kuya zingama-31 kuMasingana wakulo nyaka.
“Kuyasijabulisa ukuthi njengoba sizobe senza umcimbi wama-24 abantu baseNingizimu Afrika bayaqhubeka nokusixhasa. Sibonga kakhulu nakumboni ngokuqhubeka nokuseseka. Ngingakuqinisekisa ukuthi konke okumayelana nemingenelo nokukhethwe kwabanqobile kusingethwe ngohlelo lwezinga eliphezulu,” kubeka uSibisi.
Phezulu, eqhulwini, umunxa weBest Music Video nyakenye onqotshwe uMiss Pru ngengoma ethi Ameni unemingenelo eli-127, oweBest Collaboration onqotshwe nguKwesta ngethi Ngudu uneli-100, oweBest Produced Album ngonyaka odlule okhale wemuka noSjava ngecwecwe i-Isina Muva uthole imingenelo engama-8 bese kwathi oweBest Dance Album wathola engama-53. Nyakenye unqotshwe yiBlack Motion ngecwecwe iYa Badimo.
Kweminye iminxa, oweBest Engineered Album onqotshwe ngu-Arno Carstens ngecwecwe elithi Aandblom 13 unemingenelo engama-42, oweBest Hip Hop Album onqotshwe nguKwesta ngelithi Darak II unengama-26, oweBest Alternative Music Album onqotshwe nguKings ngelithi Native Young enengama-25 bese oweBeste Kontemporere Musiek Album onqotshwa nguJoshua na die Reen ngecwecwe iDie Wereld Binne My wathola engama-20.
Umunxa wejazz umangazile kulo nyaka njengoba ushaye oweBest Kwaito Album. Uthole imingenelo engama-25 kanti nyakenye bewukhale wemuka noNduduzo Makhathini noUmgidi Trio and One Voice Ensemble ngecwecwe i-Inner Dimension.
OweBest Kwaito Album obunqotshwe nguDr Malinga ngecwecwe iGoodwill uthole imingenelo ayisi-8 kuphela.
OweBest Contemporary Faith Music Album onqotshwe nguKhaya Mthethwa ngecwecwe iThe Dawn ube nengama-30.
OweBest African Adult Contemporary Album onqotshwe yiSoul Kulture ngecwecwe iNeliny’ ilanga unemingenelo engama-21 bese kwathi noweBest Traditional Faith Music Album wathola isibalo esifanayo.
Wona nyakenye bewunqotshwe yiSpirit of Praise ngecwecwe iSpirit of Praise Vol.6.
OweBest Maskandi Album onqotshwe nguKhuzani ngecwecwe Inyoni Yomthakathi uthole eli-16.
OweBest African
Artist Album onqotshwe nguPatoranking ngelithi Patoranking unemingenelo engama-30.
Nyakenye bekungene imingenelo eyisi-6 kuphela.
USibisi uveze ukuthi ngosuku lo mcimbi kuzoqhutshekwa nokumemezela amagama amahlanu emunxeni ngamunye.