Isikhulile kuneyakuqala iKia Picanto Smart 1.2
KULIQINISO ukuthi akuwona umuzwa omnandi ukuhamba ngemoto encane ehluleka ngisho ukuphenduka uzinwaye kuyo. Okuthokozisayo ngayo ukuthi uhamba ngokukhululeka ungalokhu ujeqeza uthi lukaphethroli ngoba iyonga ngenxa yenjini encane. Kulesi sikhathi esinzima sokwenyuka kukaphethroli kubalulekile ukwehlela ngezansi ezimotweni ezincane.
KwaKia Motors South Africa basakholelwa kakhulu ekutheni abathengi bezimoto bafanelwe ukubanjwa nxa zonke kusuka ekubadayiseleni izimoto ezinkulu njengeKia Sportage, eziphakathi nendawo okungaba iKia Rio kuze kuyoshaya kumagcina emndenini iKia Picanto. Muva nje le nkampani yethule iPicanto entsha engehlukile kakhulu kulena yakamuva, kodwa okuqaphelekayo ngentsha ukuthi ingaphambili liguqukile ngoba lithathe kakhulu isitayela samaKia esimanjemanje.
Akukho okuguqukile ohlotsheni lwezinjini ebezikhona phambilini kuPicanto okuyi-1.0 litre 3 cylinder kanye ne-1.2 litre 4 cylinder. IPicanto esesigabeni esiphezulu ebizwa ngeSmart iphuma nenjini engu 1.2 litre ekhiqiza amandla afinyelela ku-61kW kanjalo netorque abayenyusile yafika ku-122Nm. Ukwenyusa itorque ngicabanga ukuthi bakwenze ngoba amaKilowatts bathe ukuwehlisa ngamane, uma uyiqhathanisa nendala.
IPicanto Smart iphuma namalambu iLED Daytime Running kanjalo nawangemuva. Izibuko zangaphandle zisebenza ngogesi futhi ziyakwazi ukugoqeka ukugwema ukulimala. Amaindicator akhelwe kuzo izibuko, okungagcini nje ngokuba isitayela, kodwa kuhambisana kakhulu nezokuphepha ngoba imoto ekulandelayo kulula ukuthi ibone uma iPicanto izojika.
Ngaphakathi ithathelwe kwezinye izinhlobo zakwabo ezithe thuthu ngezinga ngoba iphuma nesiteringi sesikhumba. Izihlalo zehlukene kukhona eziyindwangu neziyisikhumba kanti phansi kumaphedali igqize nge-aluminiyamu.
Khona incane injalo imakwabo, iphuma nescreen esiwumbala esingu-7 inch esikunika imininingwane ngemoto futhi okwazi ukulawula kuso umsakazo neselula.
Phakathi nendawo ezihlalweni zangaphambili kunendawo yokuphumuza ingalo okuyinto engekho ezimotweni eziningi.
Ibe isivala ngeBluetooth. Ngemuva iphuma namasensa asiza umshayeli uma epaka kanjalo namasondo angu-15 inch.
Zikhona nezinye izinhlobo zePicanto njenge-1.0 litre ekhiqiza amandla afinyelela ku 49kW netorque ka-95Nm.
IKia Picanto Start (esesigabeni esiphansi njengokusho kwegama), ayinakho okutheni kodwa izokuthatha ikubeke. Iphuma nomsakazo, iBluetooth, namasondo angu 13 inch.
Olunye uhlobo iPicanto Style ephuma namasondo angu-14 inch.
Izindaba ezimnandi kwabathenga iPicanto ukuthi lonke uhlobo lwayo luphuma newaranti yeminyaka emihlanu namakhilomitha angenamkhawulo
Intengo
Isuka ku-R134 995