Ungadidwa yingaphandle, ithembekile iTUV300
NGESIKHATHI ngichofoza kancane ibhathini likakhiye maqede kuvuleka izicabha zeMahindra TUV300 bekukuningi obekusemqondweni wami ngalolu hlobo lwemoto. Ngithe uma ngishaya ukhiye ngifaka igiya eliya phambili okulandelwe ukuyinyonyobisa kancane ngiyikhwebulela emgwaqeni omkhulu onguthelawayeka ngafikelwa umqondo wokuthi sezadlula lezo zinsuku lapho bekwaziwa khona ukuthi izimoto ezihamba phambili ngezohlobo oluthile kuphela. Phela kunabantu abangathengi imoto, kodwa abathenga ibheji layo noma ngabe yona injani, futhi ababe besabheka ngisho nentengo yayo. Uma ngelinye ilanga kungathiwa akukhishwe amabheji ezimoto ziningi ezingahlaluka obala. Engiqonde ukukusho ukuthi ibheji akuyona into engumnqamulajuqu.
Ngibethulela isigqoko kwaMahindra ngomsebenzi abawenzile ezimotweni zabo zakamuva kulesi sikhathi beseNingizimu Afrika, kodwa bavale umgidi ngeTUV300. Lena iSUV eqoqekile, ingaphambili layo ligolozile, ezinhlangothini izishaya sashizolo yase ilishiya igabade. Zonke izinhlobo zeTUV300 kuleli zitholakala ngohlobo lweT M/T okuwuhlobo olushintshwayo kodwa olusesigabeni esiphezulu.
Okunye okungifikele ngihamba ngale moto ukuthi kwaMahindra bagxila kwabakwenzayo okuhambisana nokuphendula izifiso zamakhasimende njengoba benzile kule SUV. Bekungaba ayiphelele uma ingenawo amalambu enkungu angezansi kwamakhulu ngaphambili, izinsimbi ezisokhakhayini ezisiza ekuthwaleni impahla nogqinsi lwamathayi alungele ukuqwala izintaba, ukwehla imimango nokushebeleza emigwaqeni evulekile yasemadolobheni. Ngesikhathi ngishosholoza emgwaqeni omkhulu ngithande ukuphazamiseka kancane ngesipele esithe chwa kutailgate ngemuva sagamanxa ewindini. Ngzithole singiphazamisa kancane uma ngishayela ngafisa ukuthi bekungaba ngcono ukube isipele basifake ngaphansi. Okuhle nje ukuthi isicabha sangemuva sivulelwa ohlangothini futhi silula angeke usho ukuthi sinesondo elikhulu. Ilayisha abantu abayisi-7 bahlale ngokukhululeka kodwa ngiyithandile indlela abengeze ngayo izihlalo ezimbili zangemuva “ezingumagidasibhekane”. Phakathi kwazo kunesikhala esanele ongafaka kuso isikhwama segalofu, icooler box neminye imithwalo. Izihlalo zangaphambili zinezindawo zokuphumuza izingalo, okuwubufakazi bokuthi imoto eyakhelwe ukuthatha uhambo.
Emgwaqeni iyashibilika, ugiyeboksi oshintshwayo wamagiya amahlanu uwubuthebelele. Amagiya ayo angena kalula. Injini iyazinqamula ibuye iqale phansi idume uma imile ikakhulukazi emarobhithini. Lobu buchwephe bonga udizili, kanti okuhle ngabo ukuthi ungakwazi nokubucisha uma ungabudingi.
Akulula ukuzwa ukuthi ekadizili ngoba ithule futhi awukho nomsindo ohazayo emawindini uma isihamba ngejubane eliphezulu ovamise ezimotweni ezinkulu. Noma kuyimoto enkulu kodwa uma usungaphakathi ungadideka uzitshele ukuthi imoto encane ngoba inazo zonke izinto zobumnandi nobuchwepheshe njenge- infotainment system yokukhipha isithukuthezi. Isiteringi siqukethe okuningi ngemoto njengebhathini lokulawula ibluetooth. IMahindra TUV300 iphuma nenjini engu-1,5 litre edonsa ngodizili ( turbodiesel) enama- twin-stage
turbocharging. Le njini ikhiqiza amandla afinyelela ku-73,5kW kanye netorque engu-240Nm. Ugiyebhoksi onamagiya amahlanu unobuchwepheshe besimanje iMicro-Hybrid ehambisana nokonga nokwethembeka
Intengo
IMahindra TUV300 T8 Manual ibiza u- R229 995.