EZIFINGQIWE
EZENETBALL
LIZOVULA ngomdlalo onzima iqembu lakuleli lenetball kumaCommonwealth Games aqale izolo ngoLwesine e-Australia. Elakuleli (amaProteas) likuPool A lapho lizoqala neJamaica ekleliswe endaweni yesine ezilinganisweni zomhlaba. U-Erin Burger oyinsika yamaProteas uthe kuhlale kunzima ukudlala neJamaica ngoba abadlali bayo bade. Uthe okuhle ngeqembu lakuleli ukuthi liyizinsephe futhi kalidikibali. Kubukeka umdlalo ngamunye uzoba nzima kwazise mabili amaqembu azodlulela kumaplay- off. Kwelandelayo amaProteas azodlala neNorthern Ireland, i-Australia, iFiji kanye neBarbados.
EZIKANOBHUTSHZWAYO
IHIGHLANDS Park egijima kuNational First Division (NFD) kubhekeke ukuthi ibe ngompetha ngokusemthethweni njengoba idinga iphuzu elilodwa bese iqhumisa ishampeni. Leli qembu elicijwa u-Owen Da Gama linamaphuzu angama-56 emdlalweni engama-25, lizotholana phezulu ne-University of Pretoria emdlalweni ozobanjelwa eMakhulong ngelesi-3 ntambama. Abasendaweni yesibili iBlack Leopards enamaphuzu angama-41 emva kwemidlalo engama-25. IHighlands Park noma isingahlulwa yonke imidlalo emine, ngesizini ezayo izobe igijima ku-Absa Premiership.
EZOMBHOXO
ABATHANDI bombhoxo bazobe bewubheke ngabomvu umdlalo weVodacom Super Rugby ozoba phakathi kwamaLions namaStormers. Lo mdlalo uzoba kusasa ngoMgqibelo e-Emirates Airlines Park, ngele-17:15 ntambama. Umlando wala maqembu uma etholene phezulu uvuna amaStormers. Emidlalweni engama-21 eseyidlalile asenqobe eli16 yahlulwa kwemihlanu, amaLions wona asnaqobe emihlanu.
AmaLions kuligi asendaweni yesibili emva kwemidlalo eyisi-7 asanqobe emine ahlulwa kwemithathu anamaphuzu angama-20. AmaStomers wona asendaweni yesi-9 emva kwemidlalo eyisi-7 asanqobe emithathu ahlulwa kwemine anamaphuzu ali-13.
EZEKHILIKITHI
INHLANGANO ephethe ikhilikithi kuleli iCricket South Africa (CSA) imemezele ukuthi amaProteas azoba nohambo oluya eSri Lanka ngoNtulikazi kuya kuNcwaba. AmaProteas azodlala imidlalo emibili yamatest emihlanu yamaOne Day International (ODI) bese kuba owodwa wamaT20. Isikhulu uThabang Moreo uthe ithuba elihle leli ukuthi amaProteas azilungiselele iNdebe yoMhlaba ezoba seEngland ngonyaka ozayo. Uthe amaProteas kumele enze kahle kakhulu emidlalweni yosuku olulodwa ukuze ezofika e-England, esesimeni esihle ukuthi anqobe iNdebe yoMhlaba.