Lithake abancane nabadala eleSpringbok Sevens
IQEMBU lesizwe lakuleli amaBlitzbokke (Springbok Sevens) lizogadla ngabadlali abancane emqhudelwaneni weHSBC World Rugby Series, ozobanjelwa eHong Kong Stadium kusukela namuhla usongwe ngeSonto.
Abadlali abadala eqenjini bayingxenye yeqembu elidlala umqhudelwano wamaCommonwealth Games obanjelwe eGold Coast, eQueensland, e-Australia nomqeqeshi weqembu uNeil Powell.
Iqembu elizodlala eHong Kong lizobe licijwa isekela mqeqeshi uMarius Schoeman.
Laba badlali abakhona kuzomele balwele ukufa nokuphila ukunqoba iHong Kong Sevens, kwazise amazwe amabili alandela iNingizimu Afrika uma ezonqoba iwona azoqhwakela.
Elakuleli yilo elizihola phambili kuHSBC World Rugby Series ngamaphuzu ali-109, abasendaweni yesibili iFiji enamaphuzu ali-101, kuthi abasendaweni yesithathu iNew Zealand yona enamaphuzu angama-92.
Bayisihlanu abadlali abazobe beqala ukudlalela amaSpringbok Sevens, labo badlali uMfundo Ndlovu, uRhyno Smith, uMosolwa Mafuma, uHeino Bezuidenhout kanye noJames Murphy. Bonke laba badlali babhaliswe enkuliseni yakuleli iSouth Africa Rugby Sevens Academy.
UBezuidenhout nyakenye ubedlalela amaTuks ayibamba kuFNB Varsity Cup, ngonyaka wezi-2015 wayengukaputeni weqembu lesizwe labangaphansi kweminyaka eli-18 elanqoba amaCommonwealth Youth Games eSamoa.
UMafuna ubegijima kuShimlas edlala kuVarsity Cup, ubeyingxenye yenkulisa yakuleli ebidlala imiqhudelwano, eFrance, eDubai naseChile nyakenye.
UNdlovu ubemele iMpumalanga emqhudelwaneni wabangaphansi kweminyaka eli18 iCoca Cola U/18 Craven Week, wabe esejoyina inkulisa yakuleli.
USmith unesipiliyoni esingcono njengoba edlalile emqhudelwaneni emikhulu iCurrie Cup kanye neVodacom Super Rugby edlalela iLeopards neCell C Sharks. UMurphy yena uyijonile kulo nyaka.
Umdlali ozothatha indawo kaPhilip Snyman njengokaputeni uDewald Human osadlale imiqhudelwano emibili, wathola amaphuzu ayisi-7 washaya itry eyodwa.
Abadlali okubhekwe ukuthi balekelele elakuleli uRyan Oosthuizen osadlale imiqhudelwano eyisi-6, wadlala imidlalo engama-23, uStedman Gans osadlale imiqhudelwano eyisi-8 wadlala imidlalo engama-30. Omunye uSandile Ngcobo osedlale imiqhudelwano eyisi-6 wadlala imiqhudelwano engama-20.
Elakuleli liseQoqweni C lapho lizotholana phezulu neSouth Korea emdlalweni ozoba namuhla ngoLwesihlanu ngele-1:10 emini, kusasa itholane neScotland ngele-6:22 ekuseni ivale ngeEngland ngele-10:26 ekuseni.
“Sineqembu labantu abancane abahlangene nabadala sethemba ukuthi sizokwazi ukubhekana nala mazwe anzima ngaphandle kwabadlali abakhulile. Ithuba elihle leli lokuthi abadlali abancane bakwazi ukuthi bazakhele igama, Leli qembu ngilithemba kakhulu ukuthi lizokwazi ukuthi lifike kowamanqamu,” kusho uSchoeman.
Umlando wokunqoba iHong Kong Sevens kusukela ngowezi-2013 uvuna iFiji esinqobe izikhathi ezintathu, okwaba unyaka wezi-2013, owezi-2015 nangowezi-2016. Abanye iNew Zealand eyanqoba ngowezi-2014 nyakenye inqotshwe iNingizimu Africa.