Uyifaka ngazo zonke izindlela iChess KwaZulu-Natal
USIHLALO wenhlangano eyangamele umdlalo wechess esifundazweni iKwaZuluNatal, iKwaZulu Chess unezifiso ezinzulo ngalo mdlalo ongajwayelekile ikakhulukazi kubantu boHlanga athe ufuna ukuthi ungene kubona.
ULethukuthula “Nsizwa” Xulu uthe ngonyaka wezi-2008 basungula iKwaZulu Chess, ngenhloso yokuthi bafundise aboHlanga lo mdlalo athe udinga inqondo nezandla.
“IKwaZulu Chess yasungulwa ngowezi-2008 yathulwa ngokusemthethweni ngowezi-2009 eNkandla, lapho kwakukhona owayenguMengameli wezwe uMnu uJacob Zuma. Inhloso yethu ukuthuthukisa lo mdlalo ezindaweni zasemakhaya KwaZulu-Natal, ikakhulukazi ezikoleni zamabanga aphansi,” kusho uXulu.
Basuke befundisa imithetho ngqangi yokudlala lo mdlalo, amasu namaqhinga okudlalwa ngawo kanye nokubaluleka kokuvikela inkosi (king) okuyiyona into esuke kunqotshwa ngayo lo mdlalo.
UXulu ophinde abe iphoyisa eliqashwe ngokuphelele, uthe usewufakile lo mdlalo njengoba esenikezwe isikhundla esiphezulu kuwona yisifundazwe saKwaZuluNatal.
“Lo mdlalo ngiwufakile emaphoyiseni kuyimanje ngikhethelwe esikhundleni esisha sokuba uNational Development and Marketing of Saps Chess Association, besengiphinda ngibe uSekela Sihlalo weKZN SAPS Chess Team. Lokho kuyangigqugquzela ukuthi ngiwusabalalise kulona lonke elikaMthamiya,” kubeka uXulu.
Bahambele iHlengimpilo Primary School neSophunga Primary School eziseNanda, iNtuthuko Primary School eseMthonjaneni, iFort Louis Primary, iSishili Primary, Amatshensikazi Primary, iPhembela High School, kanye neLushaba High School eziseNkandla.
Ezinye izindawo abazihambelile iSicelimfundo Combined eseNquthu kanye neEthekwini Community Chucrh, nezinye izindawo eziningi.
“Siyinhlangano asenzi nzuzo konke lokhu esikwenzayo asikhokhisi lutho sikwenza mahhala noma siyihlangano engenabo abaxhasi kodwa ngezimali ezivela emaphaketheni ethu sesikwazile ukufundisa izikole ezili-10 ezinye zazo ziseNkandla, iseNquthu, iseBabanango kanye naseMelmoth,”
Isifiso esikhulu umfo kaGxabhashe ukuthi kube khona amaqembu ezikole noma ngokwezindawo, nalabo abakhubazekile bewufunde.
“Sifisa ukuthi ungene kubantu sifundise abakhubazekile, okukhulu kunakho konke ukuthi sikhiqize abaqeqeshi abasezingeni lo mhlaba. Siyafisa futhi lo mdlalo ulandeleke njengonobhutshuzwayo kuleli, sicela ukuthi abaxhasi abafisa ukuwubona uqhubekela phambili basilekelele njengoba sizizamela thina,” usho kanje uGxabhashe.
Ngabe yini umdlalo wechess?
IChess umdlalo odlalwa abantu ababili oqwembeni oluyisikwele, olusuke lunezikhala ezimuhlophe nezimunyama. Kusuke kunezinkedi zokudlala ezimnyama nezimhlophe ezifaniswa namabutho, izikwele lezi ezikulolu qwembe zifaniswa nemihlaba ebangwayo.
Kukhona izinkedi ezehlukene okuyiNkosi, uNdlunkulu, izanusi ezimbili, abagibeli bezinjomane ababili kanye nabaqaphi sigodlo ababili.
Inhloso yalo mdlalo ukuhlasela iNkosi ize ingabi nayo indlela yokuzivikela lokhu okuthiwa uCheckmate, kusho ukuthi umdlalo usuke usuphelile.