Kubhimba uhlelo kwabakuleli ngaphambi koweThe Masters
KUYINTO engabuzwa ukuthi uma kukhulunywa ngomqhudelwano iThe Masters ongomunye wemine emikhulu emhlabeni, emiqondweni yabakuleli kufika amagama amane okungelaGary Player, uTrevor Immelman nelikaCharl Schwartzel.
Laba baqopha umlando befaka elakuleli emazweni ake anqoba lo mqhudelwano okudlalwa kuwo ngesimemo.
UPlayer uwunqobe ngowe-1961, ngowe-1974 nangowe-1978.
U-Immelman uphakamise inkomishi yawo ngowezi-2008 ehlula isilomo uTiger Woods kowamanqamu bese kwathi uSchwartzel wawunqoba ngowezi-2011.
UPlayer ukwaze ukulala isibili ngowe-1962 nangowe-1965.
U-Ernie Else yena ukwaze ukulala isibili ngowezi-2000 nangowezi-2004, uTim Clark kube ngowezi-2006, uRetief Goosen noRory Sabbatini kwaba ngowezi-2007.
Empeleni uGoosen wayeqale ngowezi-2002. Ngowezi-2012 kube nguLouis Oosthuizen.
Ukwenza kahle okwakamuva kuqhamuke noSchwartzel ngonyaka odlule omangaze abaningi ephume isithathu.
Sekungumlando ukuthi umhlanganiso ugcine udliwa uSergio Garcia waseSpain.
Kulo nyaka abazomela elakuleli kuThe Masters yibo o-Immelman, uSchwartzel, u-Oosthuizen, uBranden Grace noDylan Frittelli.
U-Immelman noSchwartzel bamenywe ngenxa yomthetho walo mqhudelwano omema unomphela labo abake bawunqoba.
Uma kubhekwa umgqigqo walaba kusukela ngonyaka odlule ikakhulukazi ku-European Tour, kuPGA Tour nakuSunshine Tour yakuleli kubukeka engekho amathuba okwenza kahle kuThe Masters yalo nyaka eqale izolo ngoLwesine. Izosongwa ngeSonto, e-Augusta National Golf Club, e-USA.
UFrittelli unqobe iMauritius Open, waphuma isibili kuTurkish Airlines Open walala isine kuDP World Tour Championships.
KuHouston Open agcine ukuyidlala akenzanga kahle njengoba engaqedanga.
Okuthembisayo ngaye ukuthi ku-European Tour ukleliswe kweye-10 bese kuthi ezilinganisweni ze-Official World Golf Rankings abe kweyama-50.
UGrace unqobe iNedbank Golf Challenge wase elala isibili kuSouth African Open. Uyindoda ongeke uyiqonde njengoba ngowezi-2015 amangaza iningi ephuma isithathu kuPGA Championship. Ezilinganisweni zomhlaba ukweyama-33 bese kuEuropen Tour abe kweyama-21.
Ngemuva kokuthi u-Immelman enqobe iThe Masters ngowezi-2008 umgqigqo wakhe omuhle kawukaze ubuye. Ezilinganisweni zomhlaba ukweyama-58 bese ekleliswa kweyama-54 ku-European Tour.
Naku-Oosthuizen ngesifanayo, emiqhudelwanweni ye-European Tour wagcina ukunqoba i-ISPS Handa Perth International ngowezi-2016. Okuhle ngaye unaso isipiliyoni semiqhudelwano emikhulu njengoba ngowezi-2010 aphakamisa umgqomo wenkomishi yeThe Open Championship.
USchwartzel akayiqedanga i-Arnold Palmer Invitation agcine ukuyidlala. Naye wagcina ukunqoba umqhudelwano ngowezi-2016. KuPGA Tour kube yiVaspar Championships kwathi ku-European Tour kwaba yiTshwane Open.